Fransıanyń jańa prezıdenti Fransýa Olland pen Sosıalısik partıa múshelerinen qurylǵan jańa mınıstrler kabıneti alǵashqy májilisin ótkizip, negizgi sheshimderin qabyldady, dep habarlaıdy Habar telearnasy.

Olar ózderiniń jalaqysyn 30 paıyzǵa azaıtyp otyr. Jańa úkimet ekonomıkany qaıta qurý jáne Eýropa elderiniń qarjylyq daǵdarysyn sheshý baǵytynda burynǵy úkimetten ózgeshe saıasat ustanatynyn jarıalaǵan bolatyn. Prezıdent Olland Fransıada áleýmettik salalarǵa jumsalatyn qarjyny budan ári azaıtýdy qalamaıdy. Olland Eýropalyq Odaq elderinde qarjy únemdeýge baǵyttalǵan jalpyeýropalyq shart qurlyq elderinde ekonomıkalyq ósimdi tejep otyr jáne ony ózgertý kerek degen uıǵarymda. Búgin ol Eýropanyń ekonomıkalyq strategıasy týrasyndaǵy pikirlerin Germanıa, men Ulybrıtanıa jáne Italıa sondaı-aq, Eýropalyq Odaqtyń basqa elderiniń basshylarymen bolatyn telefon arqyly suhbattarynda túsindirmek. Eýropadaǵy daǵdarys máselesi aptanyń sońynda AQSH-ta bastalatyn Úlken Segizdik samıtiniń basty taqyryby. Fransıanyń jańa úkimeti el búdjetin teńgerý, ıaǵnı shyǵys bóligi men kiris bóligin teń ustaý saıasatyn júrgizbek. Degenmen, qazirgi daǵdarys kezinde bul ońaıǵa túspeıdi, dep habarlaıdy Associated Press agenttigi. Al jańa mınıstrler kóp nárseden úmitti.

«Bir jaǵynan qobaljyp tursam, ekinshiden boıymda qanaǵat sezimi bar. Respýblıka prezıdenti men premer-mınıstri jaqyn kúnderi halyqaralyq deńgeıdegi kezdesýlerge qatysyp, daǵdarysty eńserý máselerimen aınalysady. Al biz bolsaq, birden jumysqa kirisýimiz kerek. Aldymyzda kóp mindet turǵan shyǵar, degenmen, ázirgi baǵdarlama aıqyn», - deıdi Memlekettik reformalar jáne qoǵamdyq qyzmet mınıstri Merılız Lebranshý.

Derekkóz: bnews.kz