Saǵynysh Sabyrjanqyzy Namazshamova – 1978 jyly Taldyqorǵan oblysy, Aqsý aýdany, Qosaǵash aýylynda týǵan. 1997 jyly ál-Farabı atyndaǵy Qazaq Memlekettik ýnıversıtetiniń jýrnalısıka fakúltetin, 1999 jyly osy fakúltettiń magıstratýrasyn bitirgen.  Qazir Almaty oblysy ákiminiń baspasóz qyzmetinde bas maman. Qazaqstan Jazýshylar odaǵynyń múshesi. Halyqaralyq «Shabyt» festıvaliniń júldegeri. 2007 jyly «Arys» baspasynan «Baqyttyń baǵasy», 2009 jyly «Tórt bóri» baspasynan «Saǵynysh» atty jyr jınaqtary jaryq kórdi.

  Óreli sóz ustaǵandardyń eldi de ustaıtyny tarıhtan belgili. Biz munda tobyrdy aıtyp otyrǵan joqpyz nemese sózdiń kıesin bilmeıtin «qalamgersymaqtardy» da aıtyp otyrǵan joqpyz. Kimniń qalamǵa súıenip turǵanyn, kimniń qalamdy súıep turǵanyn oqyrman men ýaqyt belgileıdi. Bizdiki «Qazaq ádebıeti» deıtin altyn teńizde qaı qalamgerdiń qandaı eskek ustap júrgendigin, qaı arnada aǵyp jatqanyn búgingi oqyrman tarazysyna salý. Oqyrman oıyn dóp basyp, qyzý talqylanǵan qýatty sózdiń ıesin der shaǵynda baǵalaı bilip, kitabyn shyǵarýǵa «Qamshy» saıty qal-qaderinshe tyrysyp baǵady. Ádil tóreshi bolýǵa sizde tyrysyp kórińiz óreli oqyrman! Jol ústinde jolyǵyp, Jol ústinde qoshtasyp, Úlgerdik pe, bilmeımin, Qımas jandaı dostasyp?   Túıistirip kózge kóz Qaradyq pa durystap, Ekeýmizdi kútti me Aq qar basqan kúmis baq.   Estı almaı kettik pe júrekterdiń qaǵysyn, ińkárliktiń tynysyn, sezimderdiń daýysyn.   Súıikti de demedik, Súıe de almaı qanyp bir, Sizdiń juldyz ánekeı, Joǵaryda janyp tur.   Túsime ene beredi Sulý, sýyq túsi aq qar... Qyspaı qalǵan qushaqtar... Ushpaı qalǵan ushaqtar...   *   *   *   İzimiz qalǵan ińirde, óshirme dedim, Órtengen kezim – dert emgen esimde meniń. Kórmesteı bolyp kóńilim qalǵanymenen, keshirgen edim.   Talpynyp tursa dál mendeı, túsiner edim, Jıi ene beredi nesine túsime meniń?! Tákapparlyqtyń boıymda tamtyǵy qalmaı, kishireıemin.   Shıyr da shıyr sharshattym shaqyrymdardy, (Aqymaq kúıge tústim-aý, aqylym bar-dy). Miz baqpaı búgin jatqan jol, jadyrap meni shaqyryńdarshy.   Endi ashpas maǵan, ne etermin, esigin qaıtyp, Ýaqyt turdy óziniń kesimin aıtyp. Ketetin bolsam, jar salyp jahanǵa mynaý ketermin esimińdi aıtyp.   *  *  *   «Qarǵam» deshi, Tolqyn-tolqyn aǵylsyn arman kóshi. Jankeshti bop óteıin jalǵanda osy. Demeısiń be? Al onda: «Qarashanyń qol bulǵap qalǵan keshi Jalǵan» deshi.   «Táttim» deýshi eń, Aıalaýǵa jaralǵan aq gúldershe, Mańdaıyma gúldeste taqqym kelse, Tosyrqama tosynnan kelgen kim dep, jat bireýshe.   Úmitti etken, Kúlip kelip, taǵy da kúlip ketken, Qyzyq kóktem. ...Oılamaýym ózińdi múmkin emes, Sebebi, Sen jaıly oılar qanyma sińip ketken.   *   *   *   Alaqandaǵy jazýlar Ala tańdaǵy aıan bop, Jabyrqaý tartqan shaǵymdy ár Jalqy bir túnge jaıam kep.   Dátimdi berik dep edim, Dármenim jetpeı jorýǵa. Diline bekem ózegim, Dirildeıdi erni onyń da.   Jaılysyn, meıli jaısyzyn Jaqsyǵa jorý – joralǵy. Selt etkish júrek-aıshyǵym Sekemshil nege bop aldy?   Óń menen tústiń arasy Óńmennen óter aıtty ne? Qaıǵy alyp qalǵan sanasy Qaıralyp baryp qaıtty de.   Tús jorýdyń san tásilin Túsinbes shaqta qaryq qyp, «Qubylǵan kún ǵoı, ásili» - Deýshi edi ájem jaryqtyq.     *   *   *   Beımaza oı. Tún arsyz. Halim de máz emes bularsyz. Aı ǵana armanymdy uqqanda Jaı ǵana jaıymdy surarsyz. Jabyrqaý júrektiń, e, bálkim, Emshisi Siz emes shyǵarsyz.   *   *   *   Men áıelmin, janymda qyryq shyraq, Eshkimge de barmaımyn úmit surap. Sanalyǵa salmaǵy batpan ómir, Aqymaqqa, shirkin-aı, qyzyqtyraq.   Men áıelmin jylaıtyn kúlip turyp, Júrekke aýyr júk artar bilip turyp. Aı men Kúndeı ajarly, dertti júrek, Han qyzyndaı salynǵan qyryq qulyp.   Men áıelmin janardan jylý kútken, Aına aldynda syrlastym sulýlyqpen. Keshe nege, bilmeımin, jerı berdim Pesheneme buıyrǵan bir úmitten.   Men áıelmin, taýsylmas ańsar ánim, Móldirlikke mólt etip tamsa janym, Tazalyqqa talpynǵan barym dep uq. Qushaǵyna qapsyryp alsa jalyn, Órtke oranyp jatyp ta tamsanamyn.     Aqyn Sara Tastanbekqyzyna   Kindik kesip, qundaqtaǵan, ór elim! Tal besikte jyr nesipke bólediń. Saradaıyn dara týǵan sańlaqqa baǵyshtalǵan duǵam bolsyn óleńim.   Kókjaıdaǵym, yrys qonyp, tunǵan baq, Kók jaılaýym Sara bolyp jyrlanbaq. Meniń de anam jórgegimdi jýǵan sý - Aqsý jatyr burymyńdaı bulǵańdap.   Taýqymeti taýsylǵan ba taǵdyrdyń?! Zarly ún úshin, zaman, seni jazǵyrdym. Jıenqulǵa jipsiz baılap berdiń de Azattyǵyn ańsattyrdyń az kúnniń.   Arýlardyń arqalaǵan armanyn Qurban etti jazylmaǵan zańdaryń. Ómiri emes ónerine eliktep, Tirshilikte óleńimdi qarmadym.   Týǵan aıdaı tolyqsyǵan reńiń, Aqyndardyń biri eń, apa, iri ediń. Baıanjúrek jer júregi demep pe eń, Jyr júregi boldy seniń júregiń.   Bul Eshkiólmes - Jaılaýy ǵoı jaıy túsken jasynnyń Tabanynyń taby qalǵan asyldyń. Emirenip kep mańdaıymnan ıiskeshi, Balań edim, baýyryńa kep bas urdym.   Tamshybulaq... tamshy qulap tastardan, Móldirlikten uly murat bastalǵan. Aqsuńqar qyz - aq dombyra aınaly Asqaq únin estirtedi asqardan.   Endi eńsesin tiktegen gúl túsi appaq, Úzildi kenet alǵa umsynyp, úsh attap, Dala tósi aıalaǵan aq gúlin, Qarashoqy jatyr endi qushaqtap.