«Nur Otan» partıasy Tóraǵasynyń Birinshi orynbasary Máýlen Áshimbaev Elbasynyń «Qazaq tili álipbıin kırıllısadan latyn grafıkasyna kóshirý týraly» Jarlyǵyna engizilgen ózgeristerge qatysty pikir bildirdi, dep jazady Qamshy.kz aqparat agenttigi

Máýlen Áshimbaevtyń aıtýynsha, jańa nusqa halyqtyń oı eleginen ótken, barlyq pikirler eskerilip, naqty dáıekterge súıengen strategıalyq sheshim.

– Elbasy Jarlyǵyna engizilgen ózgerister qazaq tilin halyqaralyq deńgeıge jaqyndatatyn, ulttyq fonetıkamyzdyń aıasyn keńeıtetin sol arqyly qazaq qaripterin álemniń ár túkpirinde tanyp, bilýge múmkindik beretin negizgi tetik dep esepteımin, – dedi «Nur Otan» partıasy Tóraǵasynyń Birinshi orynbasary.

Sonymen qatar Máýlen Áshimbaev jazý-syzý tildiń eń názik salalarynyń biri ekenin aıtty. Sondyqtan bul másele búkilhalyqtyq talqylaýǵa usynylyp, salıqaly oı, salmaqty pikirlermen birge synı kózqarastar da aıtylǵany belgili.

Bul jóninde «Nur Otan» partıasy Tóraǵasynyń Birinshi orynbasary:

– Halyqtyń atalǵan máselege qyzý pikir bildirip, óz oılaryn erkin aıtýy kóńil qýantarlyq jaǵdaı. Bul halyqtyń saıası, áleýmettik deńgeıi men jaýapkershiliginiń artqanyn kórsetetin qubylys. Sol sebepti, búgingi nusqany qoǵamnyń talap-tilekteri men pikirleriniń nátıjesi dep bilemin, – dedi.

Engizilgen sońǵy ózgeristerdiń nátıjesinde qazaq álipbıi burynǵydan da qolaıly ári tıimdi bola túspek. Máýlen Áshimbaevtyń sózine qaraǵanda, jańa nusqa aqparattyq tehnologıaǵa beıimdelgen ári ınovasıa talaptaryna saı jáne álemdik tájirıbede keńinen qoldanylady. Máselen, portýgal, fransýz, cheh tilderinde dıakrıtıkalyq tańbalar bar.

Sondaı-aq, «Nur Otan» partıasy Tóraǵasynyń Birinshi orynbasary búginde elimizde júzege asyrylyp jatqan saıası, ekonomıkalyq, áleýmettik jáne rýhanı jańǵyrý úderisinde tilimizdiń de jańa beleske kóterilýi kemel keleshektiń kórinisi ekenin atap ótti.

– Latyn álipbıi eń aldymen halqymyzdyń básekege qabilettiligin arttyryp, pragmatıkalyq sananyń ornyǵýyna dańǵyl jol ashady. Sıfrlyq tehnologıanyń erkin enýine, ınovasıaǵa beıimdelýge, bilimniń saltanat qurýyna úlken úles qosady. Bul ıgi bastama ulttyq biregeılikti saqtap, sanamyzǵa tyń serpin beretini sózsiz, – dedi Máýlen Áshimbaev.