Atalǵan memlekettik qyzmet qazaqstandyqtar úshin bıyl qoljetimdi bolady. Bul jańalyq mindetti áleýmettik medısınalyq saqtandyrý júıesinde aqparattyq tehnologıalardy engizý jáne damytý sheńberinde iske asyrylady. Qyzmet «elektrondy úkimet» portalynda jáne Halyqqa qyzmet kórsetý ortalyqtarynda qoljetimdi bolady. Árbir azamat mindetti áleýmettik medısınalyq saqtandyrý júıesine ózi úshin jasalǵan aýdarymdardy qadaǵalaý múmkindigine ıe bolady.
Sonymen qatar, 2018 jyly Áleýmettik medısınalyq saqtandyrý qory azamattardy emhanalarǵa tirkeý boıynsha memlekettik elektrondyq qyzmetti usynatyn tehnologıany jetildirýdi josparlap otyr.
- Qazirgi tańda Medısınalyq saqtandyrý qory Elbasynyń Qazaqstan halqyna Joldaýyndaǵy tapsyrmalaryn oryndaýǵa bet burdy. Elbasy aqparattyq júıelerdi biriktirý, mobıldik sıfrlyq qosymshalardy qoldaný, elektrondyq densaýlyq pasportyn engizý, «qaǵaz qoldanbaıtyn aýrýhanaǵa» kóshý arqyly medısınalyq kómektiń qoljetimdiligi men tıimdiligin arttyrý qajettiligine asa den qoıdy, - deıdi Astana qalasy boıynsha «ÁMSQ» KEAQ fılıalynyń dırektory Nurlybek Qabdyqaparov.
Mindetti áleýmettik medısınalyq saqtandyrý boıynsha tólemderdiń kóshirmesin jáne júıege qatysýyn rastaıtyn aqparatty qazaqstandyqtar 2018 jyldyń birinshi jartysynyń sońyna qaraı HQKO arqyly ala alady.
-Qazirgi tańda bul aqparat jartylaı «elektrondy úkimet» portalynda qoljetimdi. Elektrondyq sıfrlyq qoltańbasy bar azamat «jeke kabınetine» kirip, jasalǵan sońǵy tólem boıynsha tolyq aqparatty alýǵa múmkindigi bar, - deıdi Astana qalasy boıynsha «ÁMSQ» KEAQ fılıalynyń dırektory Nurlybek Qabdyqaparov
Tirkeý naýqanynyń qorytyndysy boıynsha Astana qalasynyń medısınalyq mekemeleri qazirgi tańda bir mıllıonnan astam adamǵa qyzmet kórsetip jatyr. 1-shi qańtardan bastap Áleýmettik medısınalyq saqtandyrý qory tegin medısınalyq kómektiń kepildendirilgen kóleminiń operatory jáne medısınalyq qyzmetter úshin biryńǵaı aqy tóleýshi bolyp esepteledi. Qazaqstandyqtar men el aýmaǵynda turaqty turatyn shetel azamattary erkin túrde tirkelý quqyǵyn sheksiz paıdalana alady. Burynyraq mundaı múmkindik jarty jylda bir ret nemese tirkeý naýqanynyń sheńberinde ǵana múmkin bolatyn.
