Keshegi Úkimettiń keńeıtilgen májilisinde "Memleket qarjysynyń esebinen óz ata-babalarynyń mereıtoıyn ótkizýdi doǵarý kerek. Sonymen qatar, jón-josyqsyz ataýly kúnderdi merekeleýdi de múmkindiginshe qazirshe azaıta turǵanymyz abzal. Men ózi uly tulǵalardy dáripteýge arnalǵan mundaı sharalardy ótkizýdi qoldaımyn. Desek te, uıymdastyrý kerek bolyp jatsa, memlekettiń aqshasyna emes, demeýshilerdiń qoldaýymen at shaptyryp, as bersin. Oǵan qarlysyǵym joq. Biraq, memlekettik deńgeıde ońdy-soldy toı toılanbaýyn vıse-premer Berdibek Saparbaevqa tapsyramyn. Ondaı jıyn-toıǵa jumsalar qarajatqa balalarymyzdy oqytyp, emdegenimiz jón bolar, - dedi Nursultan Ábishuly. Óte durys aıtylǵan sóz. Bul jaǵynan oralmandardyń beti jaryq! Úkimet alystan kelgen aǵaıynnan úlgi alǵany jón! Bizdiń qandastarymyz mundaı toılardy memleketke gram salmaq salmaı-aq, óz qarjylaryna keń aýqymdy, mán-maǵanaly etip halqaralyq deńgeıde ótkizip keledi. Mysaly, 2013 jyly ótken Jakýla bolystyń 150 jyldyǵy, ótken jyly toılanǵan Er Jánibektiń 300 jyldyǵy. Ol az deseńiz, byltyr 22-qazanda Elbasy "Kelesi 2015 jyly Qazaq handyǵynyń 550 jyldyǵyn atap ótemiz" dep aıtyp, aýyz jıǵan joq, "Qamshy.kz" Portaly taǵy da sol shegara asyp kelgen aǵaıyndardyń demeýshiligimen báıge kólemi 3 000 000 teńge turatyn shyǵarmashylyq báıge jarıalap úlgirdi. Otanǵa mahabbat dep osyny aıt!