Qazaqstan Respýblıkasynyń Memlekettik hatshysy Gúlshara Ábdiqalyqova «Reforms in Kazakhstan: An analytical View» atty kitapty tanystyrý rásimine qatysty, dep habarlaıdy Qamshy.kz aqparat agenttigi. Bul jaıynda Aqordanyń baspasóz qyzmeti jazdy.

«Reforms in Kazakhstan: An analytical View» atty kitaptyń avtory – Qazaqstannyń belgili memleket jáne qoǵam qaıratkeri, joǵary mektep pen ǵylym isiniń kórnekti uıymdastyrýshysy, ekonomıs ǵalym Kenjeǵalı Ábenuly Saǵadıev.

İs-sharaǵa memlekettik organdar, ǵylymı jáne shyǵarmashylyq qoǵamdastyq, bıznes ókilderi, joǵary oqý oryndarynyń rektorlary, sonymen qatar profesorlar men oqytýshylar quramy jáne elimizdiń stýdentter qaýymy qatysty.

Memlekettik hatshy quttyqtaý sózinde Elbasy Nursultan Nazarbaevtyń strategıalyq baǵdarynyń mańyzdy basymdyǵynyń biri otandyq ǵylymdy damytý ekenin atap ótti. Memleket basshysy búkil Táýelsizdik kezeńinde ǵylymǵa jáne ǵalymdarǵa árdaıym qamqorlyq jasap, eldegi akademıalyq jáne qoldanbaly zertteýlerge jan-jaqty qoldaý kórsetip keledi.

Táýelsizdik jyldary ǵylymı qyzmetti basqarýdyń jańa modeli, ǵylymdy qarjylandyrýdyń zamanaýı tetikteri engizildi. Máselen, 2016 jyly 23 myń ǵalym jáne 383 mekeme ǵylymı-zertteý jumystarymen aınalysty. Jalpy, bul salaǵa 38 mıllıard teńge jumsalǵan.

Gúlshara Ábdiqalyqova bul monografıa táýelsizdik jyldaryndaǵy Qazaqstan ekonomıkasynyń mańyzdy máselelerin taldaýǵa arnalǵanyn, sondaı-aq onda avtordyń qoǵamymyzdy damytý barysyndaǵy túrli aspektilerge qatysty pikiri qamtylǵanyn atap ótti. Bul eńbek búkil álem úshin hrestomatıaǵa aınalyp otyrǵan Qazaqstan jolyn tereńnen tolǵaıdy.

Kitap tek bizdiń elde ǵana emes, shet elderde de keńinen talqylanyp, laıyqty baǵasyn aldy. Máselen, Kembrıdj ýnıversıtetiniń profesory Sıdhart Saksen bul eńbektiń postkeńestik keńistiktegi reformalar jóninde nusqaýlyqqa aınalǵanyn atap ótken. Al Máskeý memlekettik ýnıversıtetiniń profesory Aleksandr Býzgalınniń oıynsha, bul basylym – barlyq memleketter óz táýelsizdiginiń bastapqy jyldarynda tap bolǵan jahandyq syn-qaterlerdi eńserý erejeleriniń ózindik bir jıyntyǵy.

İs-shara sońynda Memlekettik hatshy G.N.Ábdiqalyqova akademık K.Á.Saǵadıevke myqty densaýlyq, baq-bereke, jańa shyǵarmashylyq tabys tiledi.