Bishkekte búgin uzyndyǵy 110 metrlik qazy daıyndalady, dep habarlaıdy Qamshy.kz aqparat agenttigi QazAqparatqa silteme jasaı otyryp. Buǵan deıin ulttyq taǵam sheberleri chýchýktyń (qazy - avt) uzyndyǵy 100 metr bolady dep josparlaǵan.
Osy sharany uıymdastyrýshylardyń biri Elnur Kýlýevanyń aıtýynsha, qazyny taǵy 10 metrge uzartýdyń ózindik sebebi bolǵan. Buǵan deıin qazaqtyń qazy sheberleri 100 metrlik shujyqpen Gınnestiń rekordtar kitabyna enip qoıǵan bolatyn. Endi qyrǵyz azpazdary ózderiniń shujyqtaryn 10 metrge asyryp daıyndamaq.
«Negizgi kúshti asylǵan jylqy etin ázirleýge jumsaımyz. Búgin daıyndyq bastalady, 8 jylqy soıylyp, 40 aspaz jumyldyrylady», - deıdi E.Kýlýeva. Búgin 11 naýryzda ótetin is-sharaǵa Gınnes rekordtar kitabynyń ókilderi kelip qatysatyny da aıtyldy.
Aıta keterligi, 2008 jyly Qytaıda turatyn erli-zaıypty Bolat Beıneluly men Gúlzat Azanbekqyzy uzyndyǵy 100 metr, salmaǵy 1 tonna bolatyn qazy jasap shyqqan. Ol Gıness rekordtar kitabyna engizildi. Sondaı-aq, keıinnen 2014 jyly Qytaıdyń Shyńjań-Uıǵyr avtonomıalyq ólkesine qarasty Tarbaǵataı aımaǵynyń Dórbiljiń qazaq aýdanynda «Qazaq ultynyń dástúrli taǵamdary» jármeńkesinde Gınnestiń rekordyna uzyndyǵy - 1 111 metr qazy usynyldy. Onyń salmaǵy - 4 572 kg. Qazyny jasap shyǵýǵa 44 jylqynyń eti ketken.
Eske sala ketsek, qazaq dástúrinde jylqy etinen qazy, shujyq jáne qarta daıyndalady. Olardyń ózara aıyrmashylyqtary bar. Qazy - jylqy etiniń kádeli múshelerdiń biri. Ol - jylqynyń qabyrǵalary men beldemeleriniń etegine jınalatyn asa shuraıly, maıly et. Qazy jasaý úshin eki buǵana qabyrǵa, eki tilshe qabyrǵadan basqa qabyrǵalar alynady. Qazyny ishekke tyǵady. Shujyq jasaıtyn etti tuzdap, burysh seýip salqyn jerge 1-2 kún saqtaıdy. Shujyq jasaýǵa san, qol, jon etterin alady, moıyn eti jaramaıdy. Sodan keıin maıdy da, etti de usaqtap turap, qara burysh, sarymsaq qosyp, bárin aralastyrady. Qarta - jylqy etiniń eń kádeli músheleriniń biri. Jylqy soıǵanda eń aldymen qartany ishindegisinen bosatyp, aınaldyrady da, salqyn sýǵa jýyp tazalaıdy. Qartany dámine keltirý úshin tuzdaıdy, burysh seýip, pıaz týrap qosady. Qartany asqan etke qosyp beredi. Qazy-qarta, shujyq ár óńirde ár túrli tásildermen daıyndalady.
