«Qazaqstannyń demokratıalyq tańdaýy» qozǵalysy ekstremıstik uıymdar qataryna jatqyzyldy, dep jazady Qamshy.kz aqparat agenttigi. Bul týraly QR Bas prokýratýrasynyń baspasóz qyzmeti habarlady.

«Bas prokýratýramen «Qazaqstannyń demokratıalyq tańdaýy» atty tirkelmegen qozǵalystyń zańsyz qyzmeti anyqtaldy.

Ony Qazaqstanda 20 jylǵa bas bostandyǵynan aıyrýǵa sottalǵan Muhtar Ábilázov qurǵan.

Ábilázov sotpen qylmystyq qoǵamdastyqty qurǵany, 7,5 mlrd. AQSH dollaryn urlap, shetelge shyǵarǵany úshin kináli bolyp tanylǵan.

Qylmystyq tabystardy zańdastyrý faktileri boıynsha birqatar eýropalyq elderde Ábilázovqa qatysty tergeý júrgizilýde.

Ulybrıtanıada London qalasynyń Joǵarǵy sotynyń sheshimimen Ábilázov pen onyń sybaılastarynan 4 mlrd. AQSH dollary óndirilgen.

Shetelde sot jazasynan jasyrynyp júrgen Ábilázov Qazaqstan Respýblıkasy Konstıtýsıasynyń talaptaryn buzyp, konstıtýsıalyq qurylysty kúshtep ózgertýdi nasıhattaý men úgitteý boıynsha zańsyz áreketin jalǵastyrýda.

Interenet jeliler, mesendjerler, sondaı-aq ár túrli áleýmettik toptarǵa paraqshalar taratý arqyly Ábilázov belsendi túrde Qazaqstannyń azamattaryn qozǵalysqa qosylýǵa shaqyrady, qazirgi bıliktiń jaǵymsyz beınesin quryp, qoǵamda narazylyq kóńil-kúıler qalyptastyrýda.

Osylaısha, josparly túrde áleýmettik arazdyq pen alaýyzdyqty qozdyrýda.

Narazylyq aksıalardyń beıbitshiligi týraly aıtsa da qozǵalys basshysy M.Ábilázov pen onyń belsendileriniń qylmystyq maqsaty - bılikti qulatyp, basyp alý bolyp tabylady.

Bul áreketter «Ekstremızmge qarsy is-qımyl týraly» Zań boıynsha saıası ekstremızm bolyp sanalady jáne memlekettiń qaýipsizdigine qarsy qylmys retinde qýdalanady. 

Osyǵan baılanysty, Bas prokýratýra, «Prokýratýra týraly» Zańmen kózdelgen ókilettikterin iske asyryp, sotqa qozǵalysty ekstremıstik uıym dep taný týraly aryzben júgindi.

2018 jylǵy 13 naýryzda Astana qalasynyń Esil aýdandyq sotynyń sheshimimen atalǵan aryz tolyq kólemde qanaǵattandyryldy.

Sotpen qozǵalystyń áreketi ekstremıstik dep tanylyp, oǵan Qazaqstan Respýblıkasynyń barlyq aýmaǵynda tyıym salyndy.

Sonymen qatar, bul uıymnyń áreketin aqparattyq materıaldar, buqaralyq aqparat quraldary, telekomýnıkasıa, áleýmettik jelileri, messendjerler jáne beıne-hostıngter arqyly taratýǵa tyıym salyndy.

Budan basqa, áleýmettik alaýyzdyqty qozdyrý, bılikti basyp alýdy nasıhattaý jáne oǵan jarıa túrde shaqyrý faktileri boıynsha ulttyq qaýipsizdik jáne ishki ister organdarymen sotqa deıingi tergep-tekserýler júrgizilýde.

Qurmetti azamattar, Bas prokýratýra sot sheshiminen keıin «Qazaqstannyń demokratıalyq tańdaýy» ekstremıstik uıymynyń  kez kelgen áreketine qatysqany jáne qarjylandyrǵany úshin Qylmystyq kodekstiń 182, 258 jáne 405 baptaryna sáıkes qylmystyq jaýapkershilik kózdelgenin túsindiredi.

«Qatysý» áreketine qozǵalystyń ıdeıasyn úgitteý jáne nasıhattaý, onyń jarıalanymdaryn, paraqshalaryn, posttaryn, pikirlerin jáne basqa da aqparattyq materıaldaryn daıyndaý, shyǵarý, kóbeıtý jáne taratý jatady.

Sonymen qatar, «qatysý» bolyp qozǵalysty jáne onyń basshysy Ábilázovti qoldaýda mıtıńilerdi, sherýlerdi, jarıa aksıalaryn jáne basqa jappaı is-sharalardy uıymdastyrý jáne ótkizý sanalady.

«Qarjylandyrý» uǵymyna Ábilázov pen qozǵalysqa  aqshany, ózge de múlikti berý nemese jınaý, syıǵa tartý, aıyrbastaý, qaıyrmaldyq jasaý, sponsorlyq jáne qaıyrymdylyq kómek, aqparattyq jáne ózge de qyzmet túrlerin kórsetý jatady.

Sonymen qatar, istegi zańnamaǵa sáıkes, ekstremıstik toptyń áreketine qatysýdy óz erkimen toqtatqan adam qylmystyq jaýaptylyqtan bosatylady», - delingen málimdemede.