Tasqyn sýdy ótkizýmen baılanysty tótenshe jaǵdaılardyń qaýpin tómendetý maqsatynda jyl saıyn Astana qalasy ákimdiginde elorda aýmaǵynda tasqyn sýdy ótkizýge qatysty sharalar kesheni qabyldanady, dep habarlaıdy Qamshy.kz aqparat agenttigi Astana ákimdiginiń resmı saıtyna silteme jasap.

Keshendi jospar sý tasqynynyń aldyn alatyn ınjenerlik-tehnıkalyq sharalardy qarastyrady.

Astana qalasy Tótenshe jaǵdaılar departamenti tótenshe jaǵdaılardyń aldyn alý bóliminiń basshysy Erkin Otarǵalymulynyń aıtýynsha, kóktemgi sý tasqynyna qarsy sharalar josparyn iske asyrý barysynda bıyl 3 baǵytqa basymdyq berilmek.

«Birinshi kezekte, qala arqyly aǵatyntasqyn sýdyń ótýi qaýipsizdigin qamtamasyz etý jumystaryna erekshe mán beriledi. Naýryz aıynyń sońyna deıin Astanadaǵy sý qoımasynda syıymdylyǵy 130 mln tekshe metrdi quraıtyn bos oryndy qurýdy josparlap otyrmyz. Bul oryn qar jyldam erigen kezde qala jaǵyna aǵatyn kólemdi sý túsiminiń aldyn alýǵa septigin tıgizedi», – dedi Erkin Otarǵalymuly.

Tótenshe jaǵdaılardyń aldyn alý bóliminiń basshysy, sondaı-aq Astana qalasy ákimdiginiń qazirgi tańda Esil ózeniniń arnasyn kúrdeli jóndeýden ótkizý jobasyn iske asyryp jatqanyn alǵa tartty.

«Jaqyn arada arnanyń jaǵalaýlary keńeıtilip, ózenniń túbi tereńdeteletin bolady. Mundaı jumystar da tasqyn sýdy qaýipsiz ótkizýge múmkindik beredi», - deıdi ol.

Keshendi jospardyń taǵy da bir negizgi baǵyty – jergilikti jerlerde sý deńgeıiniń kóterilýin boldyrmaý. Osy rette Tótenshe jaǵdaılar departamentiniń qyzmetkerleri qardy qala syrtyna shyǵarý jumystaryn kúsheıtip otyr.

«2017 jyldyń qazanynan búginge deıin qala aýmaǵynan qardyń 2,8 mln tekshe metri shyǵaryldy. Sý basý qaýpi tónip turǵan aýmaqtar anyqtalǵan.11 naýryzda qardy shyǵarý jumystaryna arnaıy tehnıkanyń 405 birligi jumyldyryldy. Qalany qardan tazalaý jumystaryna 232 adam tartylǵan», – dep málimdedi Erkin Otarǵalymuly.

Astana qalasy Tótenshe jaǵdaılar departamentiniń qyzmetkerleri apatty jaǵdaıdy boldyrmaý maqsatynda elorda turǵyndaryn óz úıleriniń aýlasyn qardan ýaqytynda tazartýǵa shaqyrady.