Búgin úkimet otyrysynda premer-mınıstr Baqytjan Saǵyntaev densaýlyq saqtaý mınıstri Eljan Birtanovtan halyqqa dári-dármek nege jetpeı jatqanyn surady, dep habarlaıdy  Qamshy.kz aqparat agenttigi.

 "Baqyt Turlyhanuly (qarjy mınıstri – red.eskertp) aıtyp otyrǵandaı, respýblıkalyq búdjetten bólingen 13 mlrd teńgeni densaýlyq saqtaý mınıstrligi ıgermegen. Eljan Amantaıuly (Birtanov, densaýlyq saqtaý mınıstri –avtor eskertp.) dáriler alynbaı jatyr. Naýryz aıynyń ortasyna keldik, áli dári jetpeı jatyr. Bul qalaı sonda?", — dep daýys kótere surady Saǵyntaev mınıstrden.

 "Qazirgi tańda dári-dármektiń 94 paıyzdan astamy satyp alynǵan. Jalpy óńirlerge 85 paıyzdan astam dári jetkizildi. Sońǵy dárilerdi satyp alý úshin tıisti sharalardy qolǵa alyp jatyrmyz. Qajetti dáriniń bári jetkizildi", — dedi mınıstr.

Al memleket qazynasynan bólingen aqshanyń ıgerilmeý sebebin bylaı túsindirdi:

 "Igerilmegen 12 mıllıardtyń 10 mıllıardy medısınalyq qyzmetterdi tóleý komıtetiniń jeltoqsan aıyndaǵy, sońǵy eki aptadaǵy aqshasynyń tólenbeýinen. Qajetti normatıvtik-quqyqtyq akti qabyldaýǵa baılanysty sál keshigip tólendi…", — dedi Birtanov.

Saǵyntaev mınıstrdiń sózin aıaqtatpastan, bul máseleni baqylaýǵa alýdy tapsyrdy.

Al bilim jáne ǵylym mınıstrligi 17 mıllıard teńgeni, aýyl sharýashylyǵy 8 mıllıard teńgeni ıgermegen.