Bıyl oqý grantyn bólgende «Altyn belgi» ıegerlerine tek bir ǵana basymdyq beriletin boldy, dep jazady Qamshy.kz aqparat agenttigi. Bul týraly Parlament Májilisinde ótken jıynda bilim jáne ǵylym mınıstri Erlan Saǵadıev aıtty. 

Mınıstrdiń sózinshe, bıylǵy oqýy jylyn «Altyn belgimen» aıaqtaǵan túlekter tek UBT-da jınaǵan balyna qaraı grant ıegeri atana alady.

– Bul – óte mańyzdy ózgeris. Osy másele kóp ýaqyttan beri talqylanyp júrgeni málim. Jańa zańdy Joǵary oqý oryndarynyń akademıkteri qoldady, sonymen qatar depýtattardan da ruqsat surap, bul ózgeristi qabyldadyq. UBT-nyń aldynda shyǵatyn zańnyń ózgerisi – «Altyn belgige» ıe bolǵan balalarǵa UBT balynyń nátıjesi boıynsha ǵana, eger onyń baly birdeı bolsa, oǵan grant bólinedi. Iaǵnı túlekter tek «Altyn belgi» ıegeri bolǵany úshin Joǵary oqý ornyna tegin grantqa ıe bola almaıdy, tek UBT nátıjesi boıynsha bal sany birdeı bolyp, bir orynǵa birneshe úmitker talasqan jaǵdaıda ǵana «Altyn belgi» ıegeri eskeriledi», - dedi Saǵadıev.

Bilim jáne ǵylym mınıstri byltyrǵy oqıǵaǵa da toqtalyp ótip, oqý granttaryn bólgende ádiletsizdik boldy dep kóptegen ata-analardyń shaǵym jasaǵanyn da atap ótti.

– Bul ózgeristi engizýdegi basty maqsatymyz – bıyl osyndaı keleńsizdikterdi boldyrmaý. Byltyr Astanaǵa kóptegen ata-ana kelip, shaǵym túsirgen edi, – dedi Erlan Saǵadıev.

Bilim jáne ǵylym mınıstriniń bul bastamasyna depýtattar biraýyzdan qoldaý bildirdi. Daýys berý nátıjesinde bilim týraly zańǵa jańa ózgerister engiziletin boldy.

Bilim jáne ǵylym vıse-mınıstri Asqat Qanatulynyń aıtýynsha, UBT-dan joǵary bal jınaı almaǵan, biraq mektepti úzdik bitirgen túlekter «Altyn belgi» ıegeri bolyp qala beredi.

– 5 synyptan bastap mektep qabyrǵasynda úzdik oqyǵan túlekterdi bir sátsiz synaq úshin «Altyn belgisinen» aıyrmaımyz. Biraq mektepti «Altyn belgimen» bitirgen túlekter jappaı grantqa ıe bola almaıdy. Eger olardyń UBT-dan jınaǵan baly mektepti ortasha kórsetkishpen bitirgen túlekten az bolsa, joǵary bal jınaǵan túlek grant ıegeri atanady. Al kórsetkishi teń túsken jaǵdaıda «Altyn belgi» ıegerine grant beriledi», - dedi vıse-mınıstr.