Májilis Spıkeri Nurlan Nyǵmatýlınniń tóraǵalyǵymen ótken jalpy otyrysta Palata ishki ister organdarynyń qyzmetin jetildirýge qatysty túzetýlerdi birinshi oqylymda qarap, maquldady, dep habarlaıdy Qamshy.kz aqparat agenttigi.
Atalǵan zań jobasy boıynsha İshki ister mınıstriniń orynbasary Erlan Turǵymbaev baıandama jasap, qujat aıasynda aýmaqtyq ishki ister departamentteri men jergilikti polısıa qyzmetin qurylatyn departamentterdi İshki ister mınıstrligine baǵyndyra otyryp, polısıa departamentterine biriktirý jolymen polısıa júıesin jańǵyrtý kózdelip otyrǵanyn atap ótti. Sonymen birge, ákimderge polısıa departamentteriniń aldyna qazirgi kezde jergilikti polısıa qyzmetiniń quzyretine jatatyn mindetterin qoıý quqyǵy berilmek.
Aıta keterligi, zań jobasy boıynsha jumys tobynyń otyrystarynda depýtattar jergilikti polısıa qyzmetiniń jumysyna, polısıa qyzmetiniń aıqyndyǵyn arttyrýǵa, adamdardy arnaýly úı-jaılarda ustaýdyń tártibine baılanysty usynystar engizdi.
Sondaı-aq, osy kúni Palata TMD qatysýshy memleketterdiń aqparattyq qaýipsizdikti qamtamasyz etý jónindegi kelisimge baılanysty ratıfıkasıalyq zań jobasyn maquldady.
Atalǵan kelisim aqparatty transshekaralyq berýdi uıymdastyrý, áleýetti jáne naqty qaýip-qaterlerden aqparattyq júıeler men resýrstardy qorǵaý tehnologıasyn jetildirý, aqparatty qorǵaý quraldaryn sertıfıkattaýdyń jáne sertıfıkattaý nátıjelerin ózara tanýdyń kelisilgen tártibin belgileý baǵytyndaǵy yntymaqtastyqty arttyrýǵa múmkindik beredi.
Halyq qalaýlylary jalpy otyrysta arhıv isi jónindegi túzetýlerge de qoldaý bildirdi.
Bul kúni Májilis AQSH pen memlekettik áýe kemelerine aeronavıgasıalyq qyzmet kórsetý úshin tólemaqy alýǵa qatysty, sonymen birge, Qazaqstan Úkimeti men BUU Azyq-túlik jáne aýyl sharýashylyǵy uıymy (FAO) arasyndaǵy FAO-nyń bizdiń eldegi Baılanys jáne áriptestik jónindegi búrosyn qurý týraly, sondaı-aq, Qytaımen Qorǵas ózeninde «Shúkirbulaq (Almaly)» birlesken sel ustaıtyn bógetin salýdaǵy yntymaqtastyq týraly úkimetaralyq kelisimderdi jáne 2009 jylǵy 17 qarashadaǵy Reseımen «Baıqońyr» keshenin jalǵa alý jaǵdaıynda Baıqońyr ǵarysh aılaǵynyń personalyna, Baıqońyr qalasynyń, Tóretam jáne Aqaı kentteriniń turǵyndaryna medısınalyq qyzmet kórsetý tártibi týraly úkimetaralyq kelisimge ózgerister engizý týraly hattamany ratıfıkasıalaýǵa qatysty zań jobalaryn jumysqa qabyldady.
