Astana soty burynǵy ulttyq ekonomıka mınıstri, sybaılas jemqorlyq aıyby taǵylǵan Qýandyq Bıshimbaevti 10 jylǵa sottady, dep habarlady Azattyq sot zalynan tikeleı taratylym jasap.

Sýdıa Qýandyq Bıshimbaevti Qylmystyq kodekstiń 28-babynyń 3-bólimi ("Qylmystyq quqyq buzýshylyq jasaýdy uıymdastyrǵan nemese onyń oryndalýyna basshylyq etý, sol sıaqty qylmystyq topty qurý ne oǵan basshylyq etý"), 189-baby 4-bóliminiń 2-tarmaǵy ("Top bolyp nemese astyrtyn sóz baılasyp, senip tapsyrylǵan bóten múlikti ıemdenip alý nemese talan-tarajǵa salýdy uıymdastyrý") boıynsha aıypty dep tanydy. Sot sonymen qatar Bıshimbaevti memlekettik basshylyq qyzmetti atqarý quqyǵynan ómirbaqıǵa aıyryp, qylmystyq jolmen alynǵan múlkin tárkileýge úkim kesti. Sot buǵan qosa prezıdenttiń atyna eks-mınıstrdi memlekettik "Qurmet" ordenin qaıtaryp alý týraly usynys jasaýǵa uıǵardy.

8 aı Ulttyq ekonomıka mınıstri bolǵan Bıshimbaev 2016 jyly 28 jeltoqsanda tutqyndalǵan. 

Qýandyq Bıshimbaevtyń «Báıterek» ulttyq basqarý holdıńi» AQ basqarma tóraǵasy bolǵan kezdegi, «Orda Glass» JSHS men «Shymkenthımmontaj» JSHS arqyly Qyzylordadaǵy tabaq shyny óndirý jáne óńdeý zaýytynyń qurylysynan bir mıllıard teńgeni jymqyrý boıynsha qylmystyq sqemany uıymdastyrǵan dep aıyp taǵylǵan. Bıshimbaev tergeý jumystary barysynda ózine qysym jasalǵany týraly málimdegen bolatyn.

Aıta keter bolsaq, 30 jeltoqsan kúni prezıdent Nazarbaev burynǵy ekonomıka mınıstri Qýandyq Bıshimbaevqa qatysty tergeý sharalary júrgizilip jatqanyn aıtqan edi. 

Eske salsaq, 1980 jyldyń týmasy, jas kadrlar ókili bolǵan Bıshimbaev «Bolashaq» baǵdarlamasy boıynsha Dj. Vashıngton Ýnıversıtetin bitirgen.