Nursultan Nazarbaev Reseıde ótetin prezıdent saılaýyna qatysty pikir bildirdi, dep habarlaıdy Qamshy.kz aqparat agenttigi.

Elbasy Astanada ótip jatqan Ortalyq Azıa elderi basshylarynyń kezdesýi Reseı jáne Qytaı sıaqty aımaqtaǵy úlken eldermen qarym-qatynasyna áser etpeıtinin aıtty.

– Árıne, biz Orta Azıa elderi ǵana jınalyp alyp, bul máselelerdiń sheshimin taýyp otyrǵan joqpyz. Bizdiń úlken kórshilerimiz bar, ol – Reseı men Qytaı Halyq Respýblıkasy. Bul eldermen de úlken qarym-qatynastamyz. Transport isine Reseımen tyǵyz baılanysta bolsaq, Jibek jolyna qatysty Qytaımen birge jumys istep kelemiz. Biz bul úlken kórshilerimizben ary qaraı da tyǵyz qarym-qatynasta bolamyz, bolǵymyz da keledi. Barshamyz Reseıdegi saılaýdyń jaqsy ótýine tilektespiz jáne Vladımır Vladımırovıch Pýtın myrzaǵa úlken jetistik tileımiz, - dedi Nursultan Nazarbaev.

Aıta keteıik, Ortalyq Azıa elderiniń basshylary TMD, SHYU, UQSHU, Islam konferensıasy uıymy, BUU nemese EQYU tárizdi iri uıymdar aıasynda jınalatyn, onyń bárine Reseı de qatysatyn. Al bul jolǵy kezdesý Reseı basshysynyń qatysýynsyz ótip jatyr.