Óskemendik jigit ózinen 15 jas úlken adamnyń jeke kýáligimen úsh birdeı bank qyzmetkerin san soqtyrdy, dep habarlaıdy QazAqparat.

Oqıǵa 1988 jyly týǵan aıyptalýshynyń kósheden 1974 jylǵy beıtanys adamnyń jeke kýáligin taýyp alýynan bastalady. Qujattaǵy adamnyń sýreti ózine uqsaıtynyn ańǵarǵan jigit tıisti oryndarǵa ótkizýdiń ornyna tyǵyp alady.

Jigittiń jymysqy oıyna eń birinshi Halyqqa qyzmet kórsetý ortalyǵynyń mamandary aldanǵan. Olar qujattyń jalǵan ıesine zeınetaqy jınaqtary týraly anyqtamany esh kedergisiz shyǵaryp beripti. Qajet qujattyń bári qolyna túsken soń ol áýeli «Kaspıı bankten» 3 812 074 teńgeniń nesıesin op-ońaı rásimdeıdi. Bank tarapynan eshqandaı kúdik týmaǵanyn baıqaǵan jigit qunyǵa túsken. Osylaısha, ol «Eýrazıa bankinen» 1 487 200 teńge, «Forte bank» AQ-dan 4 589 329 teńge taǵy alady. Bank qyzmetkerlerin ǵana aldap qoımaı, beıtanys adamdy 10 mln teńgeden astam nesıege dýshar etedi.

 «Sottyń 2018 jylǵy 3 naýryzdaǵy sheshimine sáıkes, kúdiktige Qylmystyq kodekstiń 177-babynyń 4-tarmaǵy boıynsha aıyp taǵylyp, 3 jyl, 9 aıǵa shartty túrde bas bostandyǵynan aıyrý jazasy taǵaıyndaldy» - deıdi Óskemen qalasynyń №2 sotynyń baspasóz qyzmeti.

Aıta keteıik, oqıǵanyń bári 2013 jyly bolǵan. Osy ýaqyt ishinde kúdikti izdeýde bolǵan Arada týra 4 jyl ótkende kúdiktiniń ápkesi bankterge baýyrynyń jasaǵan áreketi týraly málimdep, shyǵyndaryn qaıtara bastaǵan. Qazirgi tańda úsh banktiń de shyǵyny tolyq óteldi.