Taldyqorǵanda ótken Otandyq taýar óndirýshilerge qoldaý kórsetý sheńberinde satyp alý salasyndaǵy jumys komısıasynyń kezekti otyrysynda Qapshaǵaı qalasy men Panfılov aýdany ákimdikteriniń jáne aýyl sharýashylyǵy basqarmasynyń jergilikti óndirýshilerdi qoldaý máseleleri boıynsha jumys qorytyndylary tyńdaldy, dep jazady Qamshy.kz aqparat agenttigi.

Komısıa tóraǵasy, Almaty oblysy Kásipkerler palatasynyń dırektory Narıman Ábilshaıyqov ákimdikter men memlekettik organdar kásipkerlerden satyp alýlar jónindegi ashyq aqparatty jarıalamaıtynyna nazar aýdardy.

««Aqparatqa qoljetimdilik týraly» Zań boıynsha konkýrstar, tenderler ótkizý boıynsha aqparattardy, ashyq konkýrstyq saýda-sattyq, saraptama jáne basqa da is-sharalar men olardy ótkizý sharttary jóninde málimetter ınternet-resýrstarda jarıalanýy tıis. Panfılov aýdany ákimdigi, aýyl sharýashylyǵy basqarmasy men Qapshaǵaı qalasy ákimdiginiń saıttaryna júrgizilgen saraptama zańnamadaǵy talaptar oryndalmaǵynan kórsetti. Sonymen birge, resmı saıtta qajetti negizgi materıaldar, buıymdar, qurastyrylymdar men quraldardyń tizimdemesin ornalastyrý boıynsha talaptar saqtalmaıdy», - dep atap ótti Narıman Ábilshaıyqov.

Memlekettik organdar men ákimdikterdiń jergilikti quramdy arttyrý boıynsha jumystary da júıeli sharalardy qoldanýdy talap etip otyr. Máselen, Qapshaǵaı qalasy ákiminiń orynbasary Aqtanberdi Qalqabaıdyń sózinshe, 2017 jyly jalpy somasy 4 mlrd asatyn 767 kelisim-shart jasalǵan, ondaǵy qazaqstandyq quram 38,5%-ti quraǵan.

Panfılov aýdanynda qurylys-montajdaý jumystary barysynda jergilikti óndirýshilerden 15%-ke jýyq ınertti materıaldar, beton men sement qoldanylatyny belgili boldy.

«Ótken jyly Panfılov aýdanyndaǵy qurylys jumystary úshin satyp alýǵa 5 216 751 mln teńge bólindi. Qurylys-montajdaý jumystary boıynsha 40 ashyq konkýrs ótkizilgen. Mysaly, Batys Eýropa - Batys Qytaı avtojolyn salý kezinde betonnyń 25%-i jergilikti zaýyttardan alyndy», - deıdi aýdan ákiminiń orynbarasy Shýhrat Qurbanov.

Aýyl sharýashylyǵy basqarmasy basshysynyń orynbasary Qoıymjan Omarovtyń aıtýynsha, sýlandyrý júıelerin jóndeý, qaıta turǵyzý jumystaryna 2 mlrd teńgeden astam somada konkýrstar ótip, onda qazaqstandyq quram 80%-ti kórsetken. Onymen qosa, Omarov aýyl sharýashylyǵy ónimderin óndirýshilerdiń basym bóligi tyńaıtqyshtar men gerbısıdterdi shetelden satyp alatynyn aıtty. Sebebi, qazaqstandyq ónimderdiń sapasy reseılik, ózbekstandyq jáne eýropalyq kompanıalardyń ónimderinen tómen bolyp shyqqan.

Komısıa otyrysynda «Memsaraptama» RMK oblystyq fılıalynyń ókilderi «ArcellorMittal Tubular Product Aktau» AQ qatysty jaǵdaıǵa óz pikirlerin bildirdi. Kásiporyn elektrli-pisirmeli shıyrshyq-jiktik qubyrlardy shyǵaratyn jalǵyz qazaqstandyq kompanıa bolyp tabylady. Osyǵan deıin kásiporyn Talǵar aýdanynyń ákimdigi sýtaratqysh magıstralin rekonstrýksıalaý men qurylysyn júrgizý jobasyna 10704-91 memlekettik standarttaǵy túzý jik qubyrlardy negizge alǵanyn habarlady. Alaıda qubyrlardyń dál osy túri elimizde shyǵarylmaıdy, tek alys jáne taıaý shetelden ǵana eksporttalatyn bolyp shyqty.

«Kompanıa usynǵan jobalar áli saraptamadan ótken joq. Saraptama aldyndaǵy kezeń ústinde. Biz qurastyrylymdardyń sapasy men onyń jaramdylyǵy jóninde aldyn ala baǵa bere almaımyz. Sondyqtan bul suraqqa jaýapty keıinge qaldyrdyq. Saraptama aıaqtalyp, qorytyndysy belgili bolǵan soń, biz óz baǵamyzdy bere alamyz», - dedi «Memsaraptamanyń» bas mamany Svetlana Iarmýhamedova.

«Memsaraptama» ókilderi qazaqstandyq (jergilikti) quram úlesin tek qurylystyń jobalaýyn ázirleý kezeńinde ǵana baqylaı alatyndaryn jetkizdi.

«Keıinnen olar otandyq nemese sheteldik materıaldy qoldanǵan-qoldanbaǵanyn teksere almaımyz. Bul bizdiń quzirettiligimizge jatpaıdy. Aıta keteıin, 2017 jyly jobalaý boıynsha turǵyn úı jáne azamattyq maqsattaǵy qurylys nysandarynda qazquram 80%-ti, ınjenerlik-kommýnıkasıalyq jelilerinde 84%-ti, aýyl sharýashylyǵynda 70%-ti, mektepterdi jóndeýde 90%-ti qurady», - dedi «Memsaraptama» RMK oblystyq fılıalynyń óndiristik bóliminiń bas mamany Aıbek Omarbek.

Aıta keteıik, Otandyq taýar óndirýshilerge qoldaý kórsetý sheńberinde satyp alý salasyndaǵy jumys komısıasynyń otyrystary Taldyqorǵan qalasynda apta saıyn ótkizilip keledi. Kásipkerler palatasynyń alańynda ákimdikter men salalyq basqarmalardyń satyp alý salasy boıynsha jumystardy tyńdaý josparlanǵan. Ótken otyrysta Eskeldi aýdany jáne oblystyq energetıka jáne túrǵyn úı komýnaldyq sharýashylyǵy basqarmasynyń esepteri tyńdaldy.