Qazaqstan Qyzyl jarty aı qoǵamy men Bolat Ótemuratovtyń qory Shyǵys Qazaqstan oblysy Aıagóz qalasynda sý tasqynynan úıleri qırap qalǵan jáne zardap shekken azamattarǵa kómektesedi, dep habarlaıdy tengrinews.kz.

Sońǵy málimetterge sáıkes, sý tasqynynan 159 úı zardap shekken, onyń 32-si tolyǵymen qırap qalǵan jáne jóndeýge kelmeıdi. 130-dan asa adam úısiz qaldy. Olar № 6 mektep-ınternatynda ashylǵan evakýasıalyq pýnktine ornalasty. Tótenshe jaǵdaıdyń aýqymdy bolýyna baılanysty kómek kórsetilýi úshin kómek kartasy mehanızmi engizildi. Zardap shekkenderge ForteBank bankiniń arnaıy kartalary shyǵaryldy. Oǵan Bolat Ótemuratovtyń qory qarajat jiberedi. 

Qazirgi ýaqytta Qyzyl jarty aı qoǵamy evakýasıalyq pýnktine ornalastyrylǵan zardap shekkenderge qansha mólsherde qarajat keregin jáne óz úınide qalyp ne týystaryn pana etken adamdardyń tizimin jasap jatyr. 

16 naýryzda, naqty esepteýler shyǵarylǵannan keıin Qyzyl jarty aı qoǵamy men Bolat Ótemuratovtyń qory zardap shekkenderge kómek kartasyn tapsyrady. Birinshi bolyp úıi tolyǵymen qırap qalǵan azamattar alady. Bul qarajat birinshi ári eń aýyr daǵdarys kúnderinen ótýge septigin tıgizedi. 

Eske salaıyq, Shyǵys Qazaqstan oblysynda sý basqan aýyldar kvadrokoptermen túsirildi. Oblys turǵyny Ivan Egorovtyń aıtýynsha, vıdeo Óskemennen 12 shaqyrym jerde túsirilgen. Vıdeodaǵy kadrlardan kóshe men úılerdiń sý astynda qalǵanyn kórýge bolady.

"Ońtústik bólikte shamamen 30 úı sý astynda qaldy. Ol jaqta saıajaıymyz bar, kólikjaı da sý astynda qaldy, úıdiń ishin de sý basty. Qutqarýshylar túngi ýaqytta adamdardy evakýasıalady. Eki kóliktiń sý astynda qalǵanyn kórdim. Keshe biraz jańbyr jaýdy, búgin sý ketip, muz bolyp jatyr", - deıdi Ivan Egorov.

QR İİM Tótenshe jaǵdaılar komıteti ókilderiniń málimetinshe, Shyǵys Qazaqstan oblysyndaǵy qutqarýshylar táýlik boıy jumys istep jatyr.

"Qazirgi ýaqytta 15 myń tekshe metr sý tartyldy. Órt sóndirýshiler men qutqarýshylar jumys istep jatyr. Olar sýdy motopomp pen ınertti materıaldarmen tartyp jatyr. (...) 112 nómirine áli de qońyraýlar kelip jatyr. Sońǵy 24 saǵatta shamamen 3 000 qońyraý kelip tústi. Árbir qońyraý boıynsha jedel shtab ókilderi aınalysyp jatyr", - dep habarlady vedomstvo ókilderi.