«Qazaqstan Halyq Banki» AQ Elbasynyń bastamasy – «7-20-25» jobasyn qoldaıdy, alaıda qandaı da bir málimdeme beretindeı aqparat jetkiliksiz. Bul týraly «Qazaqstan Halyq Bankiniń» tóraıymy Úmit Shaıahmetova aıtty, dep habarlaıdy Qamshy.kz aqparat agenttigi.

–Bul – halyq úshin teńdesiz joba. Biz baǵdarlamamen tolyq tanys emespiz, tek nesıelerdi satyp alatyn Ulttyq banktiń enshiles kompanıasy bolatyny málim. Ol sqema óte qıyn, júzege asyrý men monıtorıń jasaý da tıimsiz. Biz ekinshi deńgeıdegi bankterde ornalastyrý múmkindigin usynamyz. Bul – tıimdi ári ońaı júıe. Mundaı baǵdarlama 2009 jyly da bolǵan, – dedi Shaıahmetova.

20 naýryzda ótken baspasóz máslıhatynda Úmit Shaıahmetova «Qazaqstan Halyq Banki» AQ-nyń 2017 jylǵy 12 aıǵa shoǵyrlandyrylǵan qarjylyq nátıjeleri týraly aıta ótip, 2018 jylǵa arnalǵan boljamdarmen bólisti.

Basqarma tóraıymynyń aıtýynsha, 2017 jyly banktiń taza kirisi 173,4 mlrd teńge bolǵan. Bul 2016 jylǵy kórsetkishten 32%-ǵa artyq. Qazkom tobyn eskermegende, Halyq Bankiniń taza kirisi 2016 jylmen salystyrǵanda 25%-ǵa ósip, 154,3 mlrd teńge boldy. Qazkom tobynyń 2017 jylǵy taza kirisi 16,6 mlrd teńge boldy.

Al 2018 jyldyń ekinshi jartysynda Qazkom-men kelisim aıaqtalady. Nátıjesinde negizgi brend Halyq Bank bolyp qalady.

Buǵan qosa «Kazahınstrah» jáne «Qazkommers-Polıs» saqtandyrý kompanıalaryn biriktirý máselesi týraly sheshim qabyldandy.

Qańtarda Qazkommersbanktiń kórsetkishi tómen boldy – shyǵyn 5 mlrd teńgege deıin jetken. 2018 jyldyń shildesinde kórsetkish qaıta qalpyna keledi.

–2017 jyly Halyk Group uıymynyń ári qaraı damýy úshin erekshe tarıhı mánge ıe boldy. Biz Qazkommersbankti satyp alýdaǵy iri mámileni aıaqtaı kele, ózimizdiń jetekshilik ornymyzdy nyǵaıta tústik jáne qazirgi naryqtyń 34%-yn ıemdenip otyrmyz. Bıylǵy jyldaǵy basty maqsatymyz – júıe qurýshy bankter men toptyń saqtandyrý kompanıalarynyń aǵymdaǵy biriktirilý prosesin aıaqtaý, – dedi Úmit Shaıahmetova.