«Nastoıashee vremá» telekanalynyń jýrnalısi Renat Davletgıldeev LDPR fraksıasynyń lıderi Vladımır Jırınovskııdi seksýaldyq álimjettik kórsetti dep aıyptady. Davletgıldeev ózge er adamdardy saıasatker tarabynan jasalǵan álimjettikti ashyq aıtýǵa shaqyrdy.
Jýrnalısiń sózinshe, Jırınovskıı 2006 jyly "Mıss Rossıa" baıqaýynyń fınalynda suhbat alar kezinde tıisken. Bul oqıǵa Davletgıldeev óziniń dástúrli emes jynystyq kózqarasyn jarıalaǵanǵa deıin bolǵan. Biraq bul jóninde aıtýdan uıalyp kelgen.
Vladımır Jırınovskııdiń uly, Memlekettik dýmanyń tóraǵa orynbasary Igor Lebedev "Nastoıashee vremá" tilshisine bul oqıǵa týraly túsinikteme berýden bas tartyp, "Sizben sóıleskim kelmeıdi. Men sizben geı áriptesińiz týraly talqylaıdy deısiz be, men ne sonshalyqty túsip kettim be?" degen.
Osyǵan deıin birqatar jýrnalıs Lıberaldyq-demokratıalyq partıanyń (LDPR) taǵy bir depýtaty Leonıd Slýskııdi de "seksýaldyq álimjettik kórsetti" dep aıyptaǵan. Memlekettik dýma komısıasy depýtattyń isinen oǵash áreket tappaǵanyn aıtyp, quqyq qorǵaý organdaryna shaǵymdanýdy usynǵan. Osydan keıin birneshe reseılik BAQ parlamentte jumys isteýden bas tartqan. Slýskııdiń ózi bul aıyptaýlardy "dalbasa" dep ataǵan.
Pikir qaldyrý