"Qazaq handyǵyna 550 jyl" shyǵarmashylyq báıgesine

Qara óleńniń qasıetin qarqaradaı saqtaǵan, Týǵan jerdiń topyraǵy, sirá, meni baptaǵan. Endi, mine, Aqıqat pen Ádildik dep urandap, Jyr-joryqqa tý kóterip attanam. Talaı-talaı tarpań minez tarlandaryn týypty el, Jaýyngermin toptan ozyp, syńǵa túser býyp bel. Rýhym asqaq, kúshim kemel, qarýymda qapy joq, O, Táńirim, júrek kirin jýyp ber! Aq almastyń aqyrǵy bir synyǵymyn, nar kósem, Jortýylda jasyn atqan babalardyń jalǵasy em. Halqym qalqan, naızam namys, aldaspanym aıbynym, Tizelikten qan keshpeımin ar keshem! Az da bolsa taǵydaıyn jele jortyp, tún qattym, Qas bórideı qaharlansam qarsy aldymda turmaq kim?! Jarq-jurq etken baldaǵy altyn qıǵyr qylysh-qalamym, Qara tasqa qaımyqpastan urmaqpyn. Ata dushpan, basty jaýym jalǵandyqqa janym qas, Maıdan qursam qorǵany men qamaly joq alynbas. Múlt ketpeımin, aıtylǵan sóz atylǵan oq mendegi, Qaıta aınalyp adyrnaǵa salynbas. Sútten appaq sezimime sýarylǵan selebem, Sharq uryp bir shabyt kelse, qozyp keter delebem. Alys barmaı dúrmek qylyp jandasatyn jaqynmen, Syrttandyǵym syrtqa salmas er emen. Ómir ózi berik túıin, beren saýyt kıgizgen, Qıan júırik tulparymnyń quıryǵyn shart túıgizgen. Úzeńgiden qapylysta taıǵanymen tabanym, Tizemdi men qara jerge tıgizben. Saǵym kóshken sar dalanyń sybaǵasyn daýlaıtyn, Qanat baılap qus-qıaly zaý bıikte zaýlaıtyn. Eı, dúnıe, men dep bilgin er qazaqtyń uryǵy, Jyr-joryqta jarty álemdi jaýlaıtyn.   Qurmanǵajy Ersin Nurjanuly