Búgin Astanada «Nur Otan» partıasy «Jas Otan» Jastar qanatynyń kezekti IV Sezi óz jumysyn bastady. «Jańa álemge jol salamyz» degen uranmen ótip jatqan Sezge elimizdiń ár óńirinen kelgen 1500-den astam delegat qatysýda.

İs-sharanyń alǵashqy kúninde Sıeziń saltanatty ashylý rásimi ótip, «Jas Otan conf» degen ataýmen arnaıy konferensıa uıymdastyryldy. Sonyń barysynda «Jas Otan» Jastar qanatynyń tóraǵasy Danıar Súndetbaev atqarylǵan jumystar jóninde esep berip, baıandama jasady.

Konferensıa jumysynan keıin jasotandyqtar birneshe toptarǵa bólinip, túrli taqyryptarda pikir almasty. Atap aıtqanda, sez delegattary «Rýhanı jańǵyrý», «Sıfrly Qazaqstan», «Qazaqstanda jasalǵan», «Bilim. Ǵylym. Inovasıa» jáne «Salamatty ult» taqyryptarynda paneldik sesıalarǵa qatysty.

Qazaqstan Respýblıkasynyń Ulttyq mýzeıinde ótken «Rýhanı jańǵyrý» sesıasynyń jumysyna «Nur Otan» partıasy Tóraǵasynyń Birinshi orynbasary Máýlen Áshimbaev arnaıy qatysty. Ol Elbasynyń atalǵan baǵdarlamasy aıasynda aýqymdy jumystar atqarylǵanyna nazar aýdardy. Máselen «Qazaqstannyń kıeli jerleriniń geografıasy», qazaq tilindegi 100 jańa oqýlyq, «Týǵan jer» jáne taǵy basqa baǵyttar boıynsha qazirdiń ózinde naqty nátıjelerge qol jetkizildi.

– Rýhanı jańǵyrýdyń basty maqsaty – babadan mıras bolǵan asyl muralarymyzdy dáripteý, ulttyq kodymyz ben qundylyqtarymyzdy saqtaý jáne halyqty ortaq múddege uıystyrý. Ol úshin ultymyzdyń bar qadir-qasıetin óskeleń urpaqtyń boıyna sińirip, sol jolda aıanbaı eńbek etýimiz kerek. Bul rette «Jas Otanǵa» sananyń ashyqtyǵyn qalyptastyrýǵa belsene qatysý, básekege qabilettilikti arttyrý, pragmatızm, eńbekqorlyq sıaqty mindetter júkteledi. Ár jasotandyq jańǵyrý aıasynda álemniń ozyq tájirıbelerin erkin meńgere otyryp, óziniń ulttyq kody men rýhanı jáne mádenı biregeıligin saqtaýy tıis, – dedi partıa Tóraǵasynyń Birinshi orynbasary.

Sondaı-aq, «Rýhanı jańǵyrý» sesıasyna Bilim jáne ǵylym vıse-mınıstri Asqat Aımaǵambetov, Mádenıet jáne sport mınıstrligi Tilderdi damytý jáne qoǵamdyq-saıası jumys komıtetiniń tóraǵasy Qýat Borashev jáne «Atameken» Ulttyq kásipkerler palatasy Aqparattyq-kommýnıkasıalyq tehnologıalar, bilim berý jáne ınovasıa komıtetiniń tóraǵasy Murat Ábenov qatysyp, taqyryp aıasynda óz oılaryn ortaǵa saldy.

Barlyq sesıa jumysyna spıker retinde ortalyq memlekettik organ basshylary, belgili saıasattanýshylar men qoǵam qaıratkerleri qatysyp, jastarmen erkin ári emen-jarqyn pikirleskenin atap ótken jón. Óz kezekterinde Sıez delegattary da asa belsendilik tanytyp, kóterilgen taqyryptar boıynsha utymdy usynystaryn joldady. Suraq-jaýap kezinde de erkin pikir almasyp, ózekti oılar aıtyldy. Nátıjesinde ár baǵyt boıynsha jastarǵa arnalǵan birneshe taqyryptyq jobalar usynyldy. Olardyń eń úzdikteri Sıeziń ekinshi kúni, ıaǵnı erteń ótetin Gala-forýmde kópshilikke tanystyrylmaq.