Parlament Senatynyń depýtattary bir kúndik jalaqylaryn sý tasqynan zardap shegip jatqan Shyǵys Qazaqstan oblysyna aýdaratyn boldy. Bul týraly 29 naýryzda Qasym-Jomart Toqaevtyń tóraǵalyǵymen ótken joǵarǵy Palata otyrysynda aıtyldy, dep jazady Qamshy.kz aqparat agenttigi. 

Senator Dúısenǵazy Mýsın Shyǵys Qazaqstan oblysynda turǵyndar sý tasqynan zardap shegip jatqanyna áriptesteriniń nazaryn aýdara kelip, aımaq halqy bir kisideı jumylyp tilsiz jaýǵa qarsy belsene kúresip jatqanyn atap ótti. Atap aıtqanda, óńirde toń qabaty (2 metrge deıin) tereń qatýyna jáne ózenderde sý deńgeıiniń shamadan tys kóterilýine baılanysty 5 qala (Aıagóz, Óskemen, Rıdder, Shemonaıha, Semeı) jáne 12 aýdan (Aıagóz, Glýbokovskıı, Ulan, Kúrshim, Úrjar, Zaısan, Zyrán, Tarbaǵataı, Shemonaıha, Katon-Qaraǵaı, Kókpekti, Besqaraǵaı) sý tasqynyna ushyrady. Osyǵan baılanysty birqatar aýdandarda tótenshe jaǵdaı jarıalandy.

Jergilikti atqarýshy organ tabıǵı apatqa baılanysty tıisti sharalar qabyldaýda. Alaıda, tehnıka jáne adam kúshi barynsha jumsalǵanyna qaramastan oryn alyp otyrǵan jaǵdaı qosymsha qarjylaı qoldaýdy qajet etedi. 

Qıyn ýaqytta qolymyz jetpese de kóńilimiz ben júregimiz osy óńir halqymen birge degen nıetpen Senat depýtattary sý tutqynynda qalǵan jáne tabıǵı apat saldarynan úlken qıyndyqtarǵa kez bolǵan Shyǵys Qazaqstan oblysyndaǵy otandastardy qarjylaı qoldap, bir kúndik eńbekaqylaryn aýdaratyn boldy.