«Jas Otan» Jastar qanatynyń IV Sezi tyń jańalyqtar men zamanaýı trendterge toly boldy. Sondaı erekshelikterdiń biri retinde Sıeziń VR, ıaǵnı vırtýaldy shynaıylyq formatynda onlaın kórsetilýin atap ótýge bolady. Sonyń nátıjesinde forým jumysyn qazaqstandyq jastar ǵana emes, álemniń barlyq ınternet qoldanýshysy 360 gradýsta kórýge múmkindik aldy.

Sıez jumysy búgin «EKSPO-2017» halyqaralyq kórmesiniń Kongres-ortalyǵynda «Jańa álemge jol salamyz» atty Gala-forýmmen jalǵasty. Forýmda «Jas Otan» Jastar qanatynyń aldaǵy baǵyt-baǵdaryn aıqyndap bergen jańa qujat qabyldandy. «Jańa álemge jol salamyz» atty bul qujatta elimizdegi jastar saıasatyna tyń serpin beretin ıgi bastamalar kórsetilgen.

İs-sharaǵa qatysqan Memlekettik hatshy Gúlshara Ábdiqalyqova Elbasynyń quttyqtaý hatyn oqyp berdi.

– Qazir búkil álem aýqymdy ózgeristerdi bastan keshirýde. Tórtkúl dúnıe Tórtinshi ónerkásiptik revolúsıa dáýirine qadam basty.

Biz uzaqmerzimdi maqsattarymyzǵa qol jetkizý úshin osyndaı qarqyndy ózgeristerdi óz paıdamyzǵa qaraı sátti júzege asyrýymyz kerek. Sol úshin biz Qazaqstanda saıası, ekonomıkalyq, rýhanı jáne áleýmettik jańǵyrýlardy qolǵa aldyq.

«Bolashaqqa baǵdar: rýhanı jańǵyrý» atty maqalamda men HHİ ǵasyrdaǵy ulttyq sana týraly jáne taıaý jyldarda qolǵa alýdy qajet etetin mindetterge erekshe nazar aýdardym. Solardyń qatarynda latyn álipbıine kóshý, «Sıfrly Qazaqstan» baǵdarlamasy, úsh tilde bilim berý sıaqty mindetterdi eldik múddeniń jańa deńgeıi dep atap óter edim.

«Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» atty bıylǵy Joldaýymda jańa zaman talaptaryna beıimdelý men jetistikterge jetýdiń joldaryn qarastyrdym.

Kúni keshegi halyqqa úndeýimde de ózimniń bes áleýmettik bastamamdy usynyp, ony júzege asyrýdyń tıimdi tetikterine toqtaldym.

Osynyń barlyǵynda men jastardyń sapaly bilim alyp, básekege qabiletti maman bolyp qalyptasýyna erekshe kóńil bólip, soǵan basymdyq berdim. Óıtkeni, sender elimizdiń erteńi ǵana emes, men aıqyndaǵan maqsattardy júzege asyratyn býynsyńdar, – delingen Elbasynyń quttyqtaý hatynda.

Eki kúnge sozylǵan aýqymdy is-sharanyń mándi de mazmundy ótkenin aıtqan «Nur Otan» partıasy Tóraǵasynyń Birinshi orynbasary Máýlen Áshimbaev elimizde qolǵa alynǵan ıgi bastamalar jas býynnyń jarqyn bolashaǵyna baǵyttalǵanyn jetkizdi.

– Biz osy Sıez arqyly jańa álemge umtylyp, damýdyń jańa kezeńine aıaq bastyq. Maqsatymyz – anyq, baǵyt-baǵdarymyz – aıqyn. Aldymyzda Elbasy belgilep bergen abyroıly mindetter tur. Sol kózdegen mejege qol jetkizý úshin judyryqtaı jumylyp jumys isteıik! Biz berekeli tirliktiń bastaýy birlikte ǵana ekenin batyl is-áreketimizben dáleldeýimiz kerek. Osy jolda barsha qazaqstandyq jastarǵa úlgi-ónege kórsetýge tıispiz!, – dedi Máýlen Áshimbaev.

Gala-forým barysynda ár salada belgili bir bıikterdi baǵyndyrǵan, qoǵamnyń damýyna ózindik úlesin qosyp kele jatqan belsendi jas qazaqstandyqtar sóz alyp, áriptesterine jetistikke jetýdiń qyr-syryn aıtyp berdi.