Instagram áleýmettik jelisinde paıdalanýshynyń ólimine baılanysty eki qyzmet bar dep jazady Qamshy.kz aqparat agenttigi. Mysaly, eger siz osy áleýmettik jelide qaıtys bolǵan adamǵa tıesili akkaýntty baıqap qalsańyz, estelik mártebesin ornatý úshin bul jóninde qoldaý kórsetý qyzmetine habarlaýyńyzǵa bolady. Bul mártebeni myna silteme boıynsha qoldaý kórsetý qyzmetine suranys joldaý arqyly ornatýǵa bolady.
Ol úshin nekrolog nemese jańalyqqa silteme túrindegi kisi ólimin rastaý talap etiledi. Eger, siz mundaı adamnyń týysy bolsańyz, onda ınstagramdaǵy akkaýnttyń joıylýyna ótinish joldaýyńyzǵa bolady jáne mundaı ótinish joldaý barysynda álgi adamnyń týysy ekenińizdiń dáleli qajet bolady: qaıtys bolǵan adamnyń týý týraly kýáligi, qaıtys bolǵan adamnyń ólimin rastaıtyn kýálik, jergilikti zańnamaǵa sáıkes, qaıtys bolǵan adamnyń zańdy ókili nemese onyń múlkin basqarýshysy ekenińizdiń dáleli. Akkaýntty joıýdy talap etý úshin myna silteme boıynsha ótinish úlgisin toltyrý qajet.
Sol sıaqty Facebook áleýmettik jelisi de paıdalanýshy týraly estelik qalsyn degen nıetpen estelik mártebesin ornatý múmkindigin usynady. Muny myna silteme arqyly oryndaýǵa bolady. Al qaıtys bolǵan jaqyn adamnyń akkaýntyn myna silteme arqyly ótip joıýǵa bolady. Bul úshin de óz týystyq jaqyndyǵyńyzdy jáne paıdalanýshynyń qaıtys bolǵanyn rastaý qajet bolady. Budan basqa, Facebook qaza tapqan azamat óz paraqshasynda bólisken materıaldardy da usyna alady. Keı jaǵdaılarda atalǵan jeliniń ákimshiligi akkaýnt nemese materıaldar týraly qosymsha aqparat alýǵa joldanǵan usynysty qarastyrýy múmkin. Ol úshin siz quzyrly tulǵa (mysaly, otbasy múshesi) ekenińizdiń dáleli nemese sot buıryǵy qajet. Bul ótinishti myna jerde rásimdeýge bolady.
Odnoklassnıkı saıtynyń ákimshiligi qaza tapqan adamnyń paraqshasyn týystardan joldanǵan arnaıy ótinish boıynsha ǵana joıa alady. Sizdiń suraýyńyz qanaǵattandyrylýy úshin qaıtys bolǵan adamnyń paraqshasyna silteme, sondaı-aq, joldanǵan hatqa qosa tirkelgen kisi ólimi týraly kýálikti de usyný qajet. Eger, siltemeni tappaǵan jaǵdaıda, paıdalanýshynyń aty-jónin, jasyn, turǵan qala ataýyn jazýǵa bolady.
Mundaı ótinishti myna silteme arqyly toltyrýǵa bolady. Alaıda, mundaı qaıǵyly jaǵdaı oryn alsa da, saıt ákimshiligi sizge qaıtys bolǵan adamnyń paraqshasy jaıly eshqandaı aqparat, logın men qupıasózdi de usynbaıdy.
Sonymen qatar, vkontakte áleýmettik jelisiniń ákimshiligi de týystardan joldanǵan ótinishti qarastyra alady. Mártebeni rastaý úshin kisi ólimi týraly kýáliktiń fotosýretin nemese kóshirmesin usynyp, ony sáıkes úlgide qoldaý kórsetý qyzmetine joldaý qajet. Bul áreketterdiń barlyǵyn myna silteme arqyly oryndaýǵa bolady.
Twitter paıdalanýshysy qaıtys bolǵan jaǵdaıda saıt ákimshiligi onyń eseptik jazbalaryn óshire alady. Ol úshin qoldaý kórsetý qyzmetine onyń quqyq murageri nemese jaqyn týysy habarlasyp, óziniń tulǵasyn rastaýy kerek jáne ótinishti myna silteme arqyly joldaı alady. Ótinishti joldaǵannan keıin ákimshilik sizge qosymsha aqparattardy usynýyńyz úshin nusqaýlyqty sizdiń elektrondyq poshtańyzǵa jiberedi. Bul jaǵdaıda paıdalanýshyǵa ol aqparattardyń qupıalylyǵy jáne qaralǵannan keıin barlyq qujattyń joıylatynyna kepildik beriledi.
Pikir qaldyrý