Sybaılas jemqorlyqqa qarsy is-qımyl ulttyq búrosynyń qyzmetkerleri Qyrǵyzstanmen shekarada bir top adamdy ustady, - dep habarlaıdy Tengrinews.kz.

Memlekettik qyzmet isteri jáne sybaılas jemqorlyqqa qarsy is-qımyl agenttigi Ulttyq búrosynyń Jambyl oblysy boıynsha departamentimen Qyrǵyzstan jáne Qazaqstan Respýblıkasynyń memlekettik shekarasy arqyly iri qara maldaryn zańsyz tasymaldaý toqtatylǵany aıtylady.

Bul is-shara UQK áskerı qarsy barlaý bóliminiń, Jambyl oblysy İİD-niń uıymdasqan qylmyspen kúres basqarmasynyń jáne "Arlan" arnaıy bólimshesiniń kúshterin tartýmen ótkizildi.

"Merki aýdanynyń keıbir turǵyndary Qyrǵyzstan Respýblıkasynda urlanǵan maldardy Qazaqstanda satý úshin memlekettik shekarany ótkizý pýnktterinen tys jerden zańsyz kesip ótetinderi anyqtaldy. Aǵymdaǵy jyldyń 1 sáýirinde túngi ýaqytta uıymdastyrylǵan is-sharanyń nátıjesinde Merki aýdannyń turǵyndary 13 bas iri qara malyn shekaradan kedergisiz ótkizýdi qamtamasyz etýi úshin shekara qyzmetshisine para bergenderi rásimdeldi", - delingen habarlamada.

Para berýshilerdiń tapsyrmasy boıynsha Qyrǵyzstan aýmaǵynan memlekettik shekarany zańsyz kesip ótip, zańsyz jolmen mal basyn ótkizgenderi úshinshekara beketiniń aýmaǵynda qazaqstandyq tórt azamat ustaldy.

"Sonymen qatar, bir mezgilde para berý deregi boıynsha kúdikpen para berýshi eki azamat ustaldy. Qazirgi tańda osy tulǵalarǵa qatysty "kepil" túrindegi bultartpaý sharasy qoldanyldy. Memlekettik shekarany zańsyz kesip ótý deregi boıynsha materıaldar jeke óndiriske bólinip, tergeý rettiligi boıynsha jiberiledi", - dep habarlady vedomstvonyń baspasóz qyzmeti.