Búgin oblys basshylyǵy «KPO b.v.» kompanıasynyń Bas dırektory Edvın Blommen kezdesti. Júzdesýde jańa qyzmetke 1 sáýir kúni resmı túrde kirisken kompanıa basshysyna oblys ákimi Altaı Kólginov sáttilik tilep, aldaǵy ýaqytta jemisti eńbek etetinine senim bildirdi.

– Elbasymyz Nursultan Ábishulynyń elimizge ınvestısıa tartý boıynsha júrgizip otyrǵan saıasatynyń nátıjesinde 1997 jyldan beri 23 mlrd.dollar ınvestısıa tartyldy. Jyl saıyn kompanıanyń negizgi kapıtalǵa salynǵan ınvestısıa kólemi 600 mln. dollardy quraıdy. Sońǵy úsh jylda jergilikti qamtý úlesi 47%-dan 54%-ǵa ósti. Byltyr rekordtyq kórsetkish – 32 mln.dollar bólinip, óńirimizde 45 joba júzege asyryldy. Kompanıamen birlesip, Bórli aýdany, Berezovka, Bestaý eldi mekenderiniń turǵyndaryn kóshirý jumystaryn ýaqytyly aıaqtadyq. Sizdiń basshylyǵyńyzben ortaq jumystardy odan ári tabysty túrde jalǵastyramyz degen senimdemin, – dedi Altaı Kólginov.

Óz kezeginde «KPO b.v.» kompanıasynyń Bas dırektory Edvın Blom QR Prezıdenti Nursultan Nazarbaevtyń sheteldik ınvestısıaǵa barynsha qoldaý kórsetip otyrǵanyn jetkizip, bızneske jaıly klımat qalyptasqan elde kompanıa tabysty jumystar atqaratynyn atap ótti.

Sonymen qatar kezdesýde óńirdegi áleýmettik-ınfraqurylymdyq jobalarǵa jyl saıyn bólinetin qarjy kólemi 20 mln.dollardan 30 mln.dollarǵa ulǵaıǵanyn atap ótti (5 jylǵa jalpy qosymsha somasy 50 mln.dollar). Qazirgi ýaqytta ortalyq memlekettik organdarmen kelisý prosesinde.

Kezdesý sońynda oblys ákimi kompanıa bastamalary men usynystaryna ákimdik tarapynan qoldaý bolatynyn jetkizdi.