Búgin, 11 sáýir Ázerbaıjan Respýblıkasynda kezekten tys prezıdenttik saılaý ótedi, dep habarlaıdy Qamshy.kz aqparat agenttigi QazAqparattyń deregin negige ala otyryp. Aıta keterligi, kezekti prezıdenttik saılaý 2018 jyldyń kúzinde ótýi tıis bolatyn. Alaıda, Ázerbaıjan prezıdenti Ilham Álıevtyń prezıdenttik saılaýdy 2018 jyldyń 11 sáýirine taǵaıyndaý týraly ókimi 5 aqpan kúni jarıalandy.
Saılaýdy merziminen buryn, kezekten tys tártibinde ótkizý negizinen Ázerbaıjanda saıası jáne áleýmettik-ekonomıkalyq reformalardy júzege asyrýǵa qosymsha múmkindikter beretinimen túsindirilgen. Sondaı-aq, bıylǵy jyldyń ekinshi jartysynda Ázerbaıjanda joǵary deńgeıdegi birqatar halyqaralyq is-sharalardy uıymdastyrý josparlanyp otyrǵany aıtylady. Sonyń eń bastysy - Ázerbaıjan demokratıalyq respýblıkasy qurylǵanynyń 100 jyldyǵy. Atalǵan deńgeıi joǵary mereke de kúzge belgilengen.
Osyndaı aýqymdy sharalardy negizge alǵan Memleket basshysy kezekten tys saılaý ótkizýdi jarıalaǵan bolatyn. Saılaýshylar prezıdentke úmitker 8 kandıdat boıynsha saılaý quqyqtaryn júzege asyratyn bolady. Kandıdattar qatarynda bılik partıasy - «Enı Azerbaıdjan» partıasy usynǵan eldiń qazirgi prezıdenti Ilham Álıev, ózin-ózi usynýshy Zahıda Orýdja, Sosıal-demokratıalyq partıasynyń ókili Araz Alızade, Birtutas halyq maıdany partıasynan Gýdrat Gasangýlıev, «Ulttyq órleý qozǵalysy» partıasynan usynylǵan Farad Gýlıev, «Jańa Mýsavat» partıasynan Hafız Gýdjıev, Ulttyq maıdan toptarynyń ókili Razı Nýrýllaev, Ázerbaıjan demokratıalyq partıasynan Sardar Mamedov bar.
Bul jolǵy saılaýdyń eń basty ereksheligi - prezıdent burynǵydaı bes jyl merzimge emes, jeti jyl merzimge saılanady. Óıtkeni 2016 jyldyń kúzindegi Konstıtýsıaǵa ózgerister men tolyqtyrýlar engizý týraly jalpyhalyqtyq referendýmda prezıdenttiń ókilettik merzimi jeti jylǵa uzartyldy.
