Áleýmettik jelini belsendi qoldanatyn saıasatkerler saýsaqpen sanarlyq. Keıbir sarapshylardyń aıtýynsha, memlekettik qyzmetkerlerdiń ınternette pikirin ashyq bildirýine búrokratıalyq júıeniń jazylmaǵan zańdary kedergi keltiredi eken. Qamshy.kz aqparat agenttigi túrli máseleler týraly Facebook-ta oı bólisip otyratyn sheneýnikterdiń tizimin usynady.
Dáýren Abaev, QR aqparat jáne komýnıkasıalar mınıstri
Áleýmettik jelide óziniń belsendi qyzmeti men berik ustanymy arqyly ózekti máselelerge ún qosyp, óz oıyn eki tilde jazyp otyratyndardyń biri – Dáýren Abaev. Facebook jelisinde QR aqparat jáne komýnıkasıalar mınıstriniń 12 myńnan astam oqyrmany bar. Mınıstr óz paraqshasynda aqparat salasyndaǵy sheshimderin jarıalaıdy. Jyl basynda BAQ týraly zańǵa engizilgen ózgeristerdi jeli qoldanýshylary birshama talqylaǵan edi. Túrli synı pikirlerge jaýap qaıtarý úshin Dáýren Abaev Facebook-te vıdeoúndeý jasap, zań jobasyna qatysty túsinikteme berdi.
Aıta keteıik, mınıstr Abaev Facebook jelisine 2016 jyldyń mamyrynda tirkelgen. Sol ýaqyttan beri áleýmettik jelide ájeptáýir tanymaldyqqa ıe boldy.
Arystanbek Muhamedıuly, QR mádenıet jáne sport mınıstri
Mádenıet jáne sport mınıstri Arystanbek Muhamedıuly óziniń Facebook-taǵy paraqshasyn 2016 jyldyń sońyna taman ashqan. Búginde jeli qoldanýshylary birshama jańalyqty mınıstrdiń jeke paraqshasynan kórip, biledi. Sonymen qatar qoǵam talqysyna túsip, jelini shýlatqan birqatar máselelerge qatysty da mınıstr óz paraqshasy arqyly pikirin bildirip, pozısıasyn aıqyndap otyrady. Arystanbek Muhamedıulynyń Facebook-ta 1000-nan astam oqyrmany bar.
Áset Esekeshev, Astana qalasynyń ákimi
Astananyń ákimi Áset Esekeshev –Facebook jelisin óte belsendi qoldanatyndardyń biri. Áleýmettik jelige tirkelgen basqa sheneýniktermen salystyrǵanda, eń kóp oqyrman da Elorda basshysynda. Búginde ony 38 myńǵa jýyq jeli qoldanýshysy baqylap otyrady. Astana ákimi Facebook-taǵy paraqshasyn 2008 jyly ashqan. Ol óz paraqshasynda únemi qalanyń tynys-tirshiliginen oqyrmandaryn habardar etip, Elordadaǵy qurylys nysandarynyń jumysyna qatysty jańalyqtardy bólisedi. Sonymen qatar jumys babymen barǵan issaparlaryn da jazyp otyrady. Resmı málimetterden bólek, Áset Esekeshev qalada oryn alǵan oqys oqıǵalar, jol apattary nemese basqa da keleńsiz jaǵdaılar týraly aıtyp, oqyrmandarynan týyndaǵan qolaısyzdyqtar úshin keshirim suraıdy. Qala ákiminiń taǵy bir ereksheligi, ol Facebook-ta saıasatqa esh qatysy joq KVN, fýtbol oıyndary jaıynda da sóz qozǵaǵandy jaqsy kóredi. Sondyqtan shyǵar, Astana basshysyna jeli qoldanýshylary ystyq yqylastaryn bildirip jatady. BAQ-tarda keltirilgen derekterge súıensek, Áset Esekeshev áleýmettik jelide Astananyń tazalyǵyna baılanysty saýaldarǵa tez jaýap qaıtarady eken.
Jeńis Qasymbek, QR ınvestısıa jáne damý mınıstri
Jeńis Qasymbek óz paraqshasynda kóbinde mınıstrliktiń atqarǵan jumystary men onyń nátıjeleri jaıynda jazady. Eldegi qýanyshty habarlardy súıinshilep otyrǵandy da unatady. Mınıstrdiń paraqshasynan Olımpıadadaǵy jeńister, «Nurly jer» memlekettik baǵdarlamasynyń oń nátıjeleri, Elbasy joldaýy týraly posttardy kóptep kezdestirýge bolady. Jeńis Qasymbek negizinen ekonomıkaǵa qatysty sóz qozǵap otyrady. QR ınvestısıa jáne damý mınıstriniń jelide 4300-deı oqyrmany bar.
Bekbolat Tileýhan, QR Parlamenti Májilisiniń depýtaty
Basy daýdan arylmaıtyn, qoǵamdyq ómirdiń bel ortasynda júrgen Bekbolat Tileýhanov ta – Facebook-tyń óte belsendi qoldanýshysy. Májilis depýtaty áleýmettik jelidegi paraqshasynda kóbinese jastarǵa, halyqqa úlgi bolarlyq ǵıbratty áńgimeler men jazbalar qaldyryp, tanymdyq foto, vıdeolarmen bólisip otyrady. Sonymen birge qoǵamda órship turǵan ózekti máselelerge qatysty óz oıyn jeli arqyly jetkizedi. Bekbolat Tileýhannyń Facebook-ta 5 myńnan astam oqyrmany bar.
Alık Shpekbaev, Memlekettik qyzmetter jáne jemqorlyqqa qarsy agenttik tóraǵasy
Memlekettik qyzmetter jáne jemqorlyqqa qarsy agenttik tóraǵasy ótken jyldyń sońyna qaraı Facebook-ke tirkelip, jeke paraqshasy bar shendilerdiń qataryna qosyldy. Alık Shpekbaev bir kúnniń ishinde 1800-deı oqyrman jınap alǵan. Qazir ony oqıtyndardyń sany 5500-ge jýyqtaǵan.
«Búginde kreatıvti oılaı alatyn adamdardyń pikiri biz úshin asa mańyzdy. Al Facebook jelisi kez kelgen adamnyń daýysyn estı alýǵa taptyrmas múmkindik beredi, sondyqtan osy jerde ózimniń jeke paraqshamdy ashyp otyrmyn», - dep jazdy Alık Shpekbaev. Agenttik tóraǵasynyń bul postyna birshama pikirler jazyldy. Óz paraqshasynda jemqorlyqqa qarsy is-qımyl agenttiginiń atqaryp jatqan jumystarymen bólisip otyratyn sheneýniktiń ár posty jelide qatty talqylanady.
Baǵdat Mýsın, QR Bas prokýratýrasynyń arnaıy esep pen quqyqtyq statısıka departamentiniń basshysy
Baǵdat Mýsın Facebook-taǵy paraqshasynda memlekettik qyzmetkerlerdiń jumysyna qatysty óz pikirin ortaǵa salyp, jeli qoldanýshylarymen birge talqylaǵandy unatady. Sonymen qatar ózi oqyǵan kitaptar jaıynda oı qozǵap, alǵan áserimen de bólisip otyrady. 2017 jyly atalmysh jelide óz paraqshasyn ashqan Baǵdat Mýsın jalyndy hám motıvasıalyq sózderge qumar. Onyń 16 myńǵa tarta oqyrmany bar.
Qasym-Jomart Toqaev, QR Parlamenti Senatynyń tóraǵasy
Senat tóraǵasy Qasym-Jomart Toqaev Facebook jelisine qaraǵanda Twitter jelisi qoldanýǵa óte yńǵaıly dep esepteıdi. Sheneýniktiń Twitter-degi posttaryn 160 myńnan astam oqyrman kóre alady eken. Saıasatker atalmysh jelide áleýmettik-saıası oqıǵalarmen bólisip otyrady, oqta-tekte óz pikirin jazyp qaldyrady. Qasym-Jomart Toqaevtyń latyn álipbıine qatysty jazǵan posty jeli qoldanýshylary arasynda keńinen talqylanyp, eń kóp pikir jazylǵan jazbaǵa aınaldy. Dál sol mezette latyn álipbıiniń apostrofpen jasalǵan nusqasyna qatysty jelide shý shyǵyp jatqan bolatyn.
Sonymen, áleýmettik jelini belsendi qoldanatyn bılik ókilderiniń tizimi osyndaı. Aıtpaqshy, bir kezderi Facebook-ta turaqty qoldanýshysy bolyp, keıin paraqshasyn qaraýsyz qaldyrǵan shendiler de joq emes. Kárim Másimov UQQ tóraǵasy qyzmetine saılanǵannan bastap jelide qandaı da bir post jazýyn toqtatqan bolsa, onyń orynbasary Dáýlet Erǵojın qyzmetke taǵaıyndala salysymen óz akkaýntyn múlde óshirip tastaǵan.
