Almatyda belgili rejıser Ermek Tursynovtyń shyǵarmashylyq keshi ótti. Sońǵy jyldary elimizge «Kelin» jáne «Shal» fılmimen tanymal bolǵan rejıser óziniń shyǵarmashylyǵy men ómiri týraly kóptiń kóńilinde júrgen suraqtarǵa jaýap berdi. Ermek Tursynov óziniń nashar stýdent bolǵanyn aıta kelip, qıqar minezi úshin oqýdan da shyǵyp qalǵanyn jasyrǵan joq. Kezinde QazMÝ-dyń jýrnalısıka fakúltetiniń dekany Temirbek Qojakeev: «Tursynov, sen meniń qara tizimimde ekinshi tursyń» dep aıta bergen soń, «aǵaı, onda birinshi bolyp kim tur?» dep surapty. Sonda ǵalym-ustazy: «Ol baıaǵydan beri túrmede otyr» dep jaýap beripti. – Stýdent kezimde 40 som stıpendıa aldym, et kombınatynda jumys is­­tep, qosymsha aqsha da taptym, – deıdi rejıser. Onda jumysqa kirý de ońaı bolmap­ty. Áıteýir amalyn taýyp, et kombınatynda qasapshylyqty úırenip qarajat taýypty. Al Máskeýde oqyǵanda ot jaǵýshy, balabaqshada kúzetshi de bolǵan. Al AQSH-ta túrli kásipti meńgerip, ómirden kóp nárse úırenedi. Qazaqstanǵa oralǵan soń televıdenıa men radıo korporasıasyn basqaryp, gazet te ashqan. Keshte «Shal» fılmi sóz boldy. Al naýryz aıynda «Kenje» atty kartınany túsirýdi bastamaqshy. Ol «Kenje» túsirilimi úshin kóne meshit izdepti. Sebebi rejıser biraz jyl Taıaý Shyǵysta turǵandyǵyn aıta kelip, sondaǵy meshitterge uqsas ǵımaratty qarastyrǵan. Damaskide eń jańa meshitke 800 jyldaı bolsa, Almaty oblysynan birde-bir kóne meshit tappapty. Rejıser álemniń ár túkpirinde bolýmen qatar, ondaǵy qazaqtarmen kezdesip, qonaqta bolǵandyǵyna toqtaldy. Olar; «O, qazaq keldi!» dep qýana qarsy alǵan. Olardyń arasynda óz tilin bilmeıtinder kezdeskenimen, ultyna kórseter qurmetteri sheksiz eken. Tanymal rejıser Ermek Tursynovqa shetelden suranys ta túsipti. «Juldyz» jasaýǵa kepildik te berip­­ti. Biraq ol barlyǵynan bas tartqan. Olardyń senarılerinen adam shoshıtyndyǵyn aıtqan rejıser: «Et kombınatynda júrgendegi ómirim esime túsedi deıdi ol. Sondyqtan vampırler týraly túsirýden bas tartypty. Ermek Tursynovtyń bul shyǵarmashylyq keshi kóptiń kóńilinen shyqty.