Din isteri jáne azamattyq qoǵam mınıstrliginiń Azamattyq qoǵam isteri jónindegi Komıtet tóraǵasynyń burynǵy orynbasary Baýyrjan Mýsınge qatysty sot úkimi shyqty. Bul týraly Qamshy.kz aqparat agenttigi Astana sotynyń baspasóz qyzmetine silteme jasap habarlaıdy.

«2018 jyldyń 16 sáýirinde Astana qalasy Almaty aýdandyq №2 soty Din isteri jáne azamattyq qoǵam mınıstrliginiń Azamattyq qoǵam isteri jónindegi Komıtet tóraǵasynyń burynǵy orynbasary Baýyrjan Mýsınniń Kolpakovtan Kolpakovtan Assar KZ JSHS múddesi úshin 1 000 000 teńge jáne jeke kásipker Qulsharıevten 400 000 myń teńge para aldy degen aıyp taǵyp, sot úkimin shyǵardy», - delingen sotta.

2016 jyldyń 15 jeltoqsanynda komıtet tóraǵasynyń orynbasary Mýsın men «Assar KZ» JSHS dırektory arasynda 4 900 000 teńgege memlekettik taýar satyp alý týraly kelisimshart jasalǵan. Sot deregi boıynsha, Mýsın Kolpakovtan jetkizilmegen taýardy qabyldady degen aktige qol qoıǵany úshin 1 000 000 teńge para aldy.

Buǵan qosa, Mýsın jeke kásipker E.G. Qulsharıevten 400 000 teńge para alǵan.

Sot úkimimen Baýyrjan Mýsın 7 jylǵa bas bostandyǵynan aıyrylyp, jazasyn qaýipsizdigi ortasha qylmystyq-atqarý júıesi mekemesinde óteıdi. Sondaı-aq, memlekettik qyzmetpen aınalysý quqyǵynan ómir boıyna aıyryldy. Sot úkimi zańdy kúshine engen joq.

Eske sala keteıik, Din isteri jáne azamattyq qoǵam mınıstrliginiń komıtet basshysynyń orynbasary Baýyrjan Mýsın 2017 jyldyń 31 naýryzynda para alǵany úshin ustalǵan.