QR Aqparat jáne komýnıkasıalyr mınıstri Dáýren Abaev búgingi Úkimet saǵatynda halyqty sıfrlyq saýattandyrý turǵysynda baıandama jasady, dep habarlaıdy Qamshy.kz aqparat agenttigi. Mınıstrdiń aıtýynsha, sıfrlyq Qazaqstan baǵdarlamasyndaǵy basym baǵyttardyń biri – adam kapıtalyn damytý bolyp sanalady. Osy memlekettik baǵdarlamanyń aıasynda 2020 jyly kezeń kezeńimen el turǵyndarynyń sıfrlyq saýattylyǵyn 83 paıyzǵa arttyrý josparlanýda eken.
Mınıstr halyqty sıfrlyq saýattandyrý jumysy birneshe kezeńder boıynsha iske asatynyn aıtty.
"Eń aldymen sıfrlyq saýattylyq degen termınniń biryńǵaı túsinigin anyqtap alýymyz qajet. Qarapaıym tilmen aıtar bolsaq, bul – adamdardyń aqparattyq tehnologıalardy kúndelikti ómiri men jumysynda erkin paıdalana bilýin qamtamasyz etý. QR Aqparat jáne komýnıkasıalar mınıstrliginiń aqparattandyrý zańyna sáıkes ekonomıka mınıstrligimen birigip halyqtyń sıfrlyq saýattylyǵyna baılanysty birneshe deńgeıdi anyqtadyq:
1 Bazalyq. Bul jerde kompúter men mobıldik gadjetterdi paıdalana bilý, ınternet arqyly aqparat alý men taǵy basqa baǵyttardy ataýǵa bolady.
2 Tranzaksıalyq baǵyttardy meńgerý qabileti. Iaǵnı, elektrondy jáne ashyq úkimet servısterin paıdalana bilý, qyzmetter alý men tólem jasaý múmkindigin ıgerý.
3 Internet jelileri arqyly satyp alý, satý jáne taýardy naryqta jyljytý qyzmetterin erkin meńgerý, qarapaıym tilmen aıtqanda, elektrondy saýdany úırený.
4 Sıfrlyq quraldardy paıdalaný. Mysaly, mobıldik qosymshalardy erkin ıgerý, gadjetterdiń jumysyn sınhrondaý.
5 Kásibı deńgeı. Bul jerde baǵdarlamalaý qabiletin jáne baǵdarlamalaýǵa baılanysty sheshimder. Óz erkimen qura bilý qabiletin ataýǵa bolady", - dep málimdedi Dáýren Abaev.
Onyń aıtýynsha, qazirgi tańdaǵy baǵalaýǵa baılanysty el turǵyndarynyń sıfrlyq saýattylyǵynyń bazalyq deńgeıi 77 paıyzdy quraıdy. Jyl sońyna deıin bul kórsetkishti 78,5 paıyzǵa ulǵaıtýdy josparlap otyr.
"Osy maqsatta birqatar jumystar atqarylady. Birinshi sıfrlyq saýattylyqty oqytý jónindegi metodıkalyq usynystar daıyndaldy, halyqta sıfrlyq saýattylyqqa baýlıtyn oqytý formasy men kategorıalaýǵa baılanysty talaptar qoıyldy. Ekinshi, bazalyq baǵyttaǵy bilim berý boıynsha tórt baǵdarlama ázirlendi.
Qazirgi ýaqytta halyqtyń sıfrlyq saýattylyǵyn artyrýǵa baılanysty eki baǵyt belgilendi: ortalyq memlekettik organdar halyq pen kásibı mamandarǵa osy salalar boıynsha jan-jaqty bilim beredi, al ekinshi baǵyt boıynsha, el turǵyndaryn jergilikti atqarýshy organdar oqytady. Birinshi baǵyttyń aıasynda Eńbek jáne halyqty áleýmettik qorǵaý mınıstrligi, Densaýlyq saqtaý mınıstrligi, Bilim jáne ǵylym mınıstrligi men Aýylsharýashylyq mınıstrligi jaýapty memlekettik organdar retinde qatysady. Atalǵan memlekettik organdar sıfrlyq saýattylyqqa baılanysty qosymsha bilim berýge atsalysatyn bolady", - dep mınıstr jaýapty organdardy atap ótti.
