Rıdder ákiminiń orynbasary 19 jastaǵy jigitti qaǵyp óltirgen kezde kólik salonynda Óskemen ákimi de bolǵany anyqtaldy dep jazady Qamshy.kz aqparat agenttigi.  

Aıta ketsek, jol apaty kezinde rólde Rıdder ákiminiń orynbasary bolǵan.

«Jol apaty kezinde kólik ishinde Qurmanbaevpen birge Óskemen ákimi Tumabaev ta bolǵany belgili boldy», dep jazady SHQO prokýratýrasynyń baspasóz qyzmeti.

Qadaǵalaý vedomstvosynan habarlaýy boıynsha, 19 sáýirde Rıdder qalasynyń prokýratýrasyna qaıtys bolǵan jigittiń ákesi aryzdanyp, apatqa kináli júrgizýshini ustaýǵa ýaqtyly shara qabyldamaǵany úshin İİB qyzmetkerlerin jaýapqa tartýdy suraǵan. 

Biraq dál sol kúni qalalyq prokýratýraǵa qaza tapqan jigittiń ákesiniń dosy Rıdder İİB krımınaldy polısıa bóliminiń bastyǵy qysym kórsetip jatqanyn aıtyp shaǵymdanǵan. bolatyn.  

«Atalǵan faktilerge qatysty oblystyq İİD Ózindik qaýipsizdik basqarmasy QK 370-baby (qyzmettegi áreketsizdik) jáne 362-baby 4-tarmaǵy (kúsh qoldanyp, laýazymdyq ókilettikterdi asyra paıdalaný) boıynsha sotqa deıingi tergeý júrgizip jatyr», — delingen SHQO prokýratýrasy baspasóz qyzmetiniń resmı habarlamasynda. 

Qazir qylmystyq isterdi tergeý qadaǵalaý vedomstvosynyń baqylaýynda.

Qazirgi tańda Baýyrjan Qurmanbaev ýaqytsha ustaý ızolátorynda jatyr. Óskemen ákimdigi ázirge atalǵan jaǵdaıǵa qatysty túsinikteme bermedi. Keshe qalalyq ákimdik baspasóz máslıhatyn ótkizbek bolǵanymen baspasóz maslıhaty ótken joq.