Qazaqstan Respýblıkasy premer-mınıstri Baqytjan Saǵyntaev jumys saparymen Jezqazǵan óńirine bardy, dep habarlaıdy Qamshy.kz aqparat agenttigi premer-mınıstrdiń baspasóz qyzmetine silteme jasap.

Saparyn Qaraǵandy oblysy Sátbaev qalasynan bastaǵan Úkimet basshysy qalada jańadan salynyp jatqan «Nurly meken» yqsham aýdanynda boldy. «Nurly meken» shaǵyn aýdanyna Jezqazǵan qalasynyń apatty úıleriniń turǵyndary jáne mys ken oryndaryn qaıta óńdeý kezinde qulaǵan aýdan aımaǵyndaǵy kórshi eldi meken adamdary kóshiriledi. Olar Jezqazǵan, Sátbaev jáne Ulytaý óńirlerin áleýmettik-ekonomıkalyq damytýdyń 2012–2020 jyldarǵa arnalǵan keshendi jospary aıasynda jańa páterlerge ıe bolady.

Sonymen qosa, B. Saǵyntaev Sátbaev qalasyndaǵy «Haným» makaron ónimderin shyǵaratyn kásiporyndy aralaý barysynda óńirde SHOB damytý qarqynymen, sondaı-aq Ónimdi jumyspen qamtý jáne jappaı kásipkerlikti damytý baǵdarlamasyn iske asyrý barysymen tanysty.

Artynsha at basyn Jezqazǵanǵa burǵan Úkimet basshysy «KazakhmysSmelting» JSHS Jezqazǵan mys qorytý zaýytynda boldy, onda ekinshi ken qyzdyrý peshin rekonstrýksıalaý barysymen tanysty.

Baqytjan Saǵyntaev nysanda katodty mys óndirisiniń tehnologıalyq úderisin, aınalmaly quıý mashınasy men anodty mys quıý jumysyn tekserdi. Jezqazǵan mys qorytý zaýyty iske qosylǵan kezden beri jer qoınaýynan 1 mlrd tonnadan astam ken óndirildi. 2018 jyldyń qańtar-naýryz aılarynda 30,7 myń tonna tazartylǵan mys óndirildi.

Kásiporynnyń bas dırektory Á. Bármenqulov daıyn ónimder qoımasyn kórsetip, Jezqazǵan mys qorytý zaýytyn tehnologıalyq jańǵyrtý josparlarymen tanystyrdy.

Jezqazǵan mys qorytý zaýytynyń qýattylyǵy jańa kúkirt qyshqyldy seh qurylysy aıaqtalǵan soń, eki ken qyzdyrý balqytý peshteriniń (KQP) jumysy esebinen ulǵaıtylady. Esterińizge sala keteıik, buǵan deıin 2009 jyly qoljetimdi shıkizat kóleminiń azaıýyna baılanysty zaýyt bir KQP jumys rejımine kóship, ekinshi balqytý agregatynyń jumysy toqtatylǵan edi. Aqtoǵaı jáne Bozshakól ken baıytý fabrıkalarynyń josparly iske qosylýy aıasynda quramynda mys bar shıkizat kóleminiń ulǵaıýyna baılanysty ekinshi KQP iske qosý týraly sheshim qabyldandy.

Á. Bármenqulovtyń aıtýynsha, zaýyt óz qýattylyǵyn jartylaı paıdalanyp jumys isteý arqyly jylyna 100 myń tonna mys óndirgen. Ekinshi peshtiń iske qosylýymen ónim kólemi eki esege artady. Bul mys óndirisiniń álemdik naryǵyndaǵy kompanıanyń básekege qabilettiligin ulǵaıtýǵa jol ashady. 600-ge jýyq adam turaqty jumyspen qamtamasyz etiledi. Memlekettik búdjetke salynatyn aýdarymdar júzdegen mıllıon teńgege ósedi.

Jezqazǵanǵa sapary barysynda B. Saǵyntaev «Baıan» kompanıasy men «Qazaqmys» korporasıasynyń Medısınalyq ortalyǵynda da bolyp, jumys barysymen tanysty.