«Atakent» ornalasqan aýmaq qala menshigine qaıtarylmaq.

Almatydaǵy «Atakent» kesheniniń jeri qalanyń komýnaldyq menshigine qaıtarylady. Al keshenge kireberis qaqpa aldyndaǵy avtoturaq túgeldeı joıylyp, birde-bir kólikke arkaǵa kirýge tyıym salynady. Qala ákimi Baýyrjan Baıbek qaramaǵyndaǵylarǵa búgin osyndaı tapsyrma berdi. Óıtkeni, iskerlik ortalyqty basqarýshy kompanıa aýmaqqa atústi qarap, damytý jónindegi mindetterin oryndamaǵan. Endi saıabaqtyń sánin ketirip, tynyǵýshylarǵa jaǵdaı jasamaǵandarmen kelisimshart buzylady.

Atakent aýmaǵyndaǵy saıabaq bir kezderi qala turǵyndarynyń jıi keletin keremet demalys orny bolǵan. Qazir munda adam qarasy kóp kórinbeıdi. Tek jaqyn mańda turatyn turǵyndar ǵana tynyǵady. Óıtkeni, qaraýsyz qalǵan baqtyń sáni ketip, jurtqa múldem jaǵdaı jasalmaı otyr. Saıabaqtyń ishindegi tas joldar men bordúrlar opyrylyp jatyr. Shirigen butaqtar da tıisti tazalanbaǵan. Kezinde tiz qatar qoıylǵan oryndyqtar da ábden eskirip ketken.

Saıabaq ishindegi zeınetkerlerge arnalǵan oryn da «jetim qyzdyń kúıin» keship otyr. Bir kezderi munda qalanyń qarttary bas qosyp, shahmat oınap, áńgime-dúken quratyn. Qazir bul orynnyń kúıi ketip, julym-julymy shyqqan. Budan bólek, turǵyndar balalar oınaıtyn alańdardyń joqtyǵyna qapalandy. Saıabaq ishinde búldirshinderge arnalǵan jalǵyz orynnyń syıqy mynaý.

Endi turǵyndardy mazalaǵan másáleler sheshimin tabady. Óıtkeni, mundaı bassyzdyqtardy óz kózimen aralap kórgen qala ákimi Baýyrjan Baıbek aýmaqqa atústi qarap, kóriktendirý jumystaryn jasamaǵan basqarýshy kompanıamen kelisimshartty buzýdy tapsyrdy. Ári, «Atakenttegi» telimdi qalanyń komýnaldyq menshigine qaıtarýdy qadap aıtty. Keshen aınalasyndaǵy asfáltty jerdi azaıtyp, jasyl jelekti kóbeıtýdi alǵa tartty. Sondaı-aq otyratyn oryndyqtar men qoqys jáshikterin aýystyrýdy mindettedi.

Budan bólek, jaıaý júrginshilerdiń qaýipsizdigin qamtamasyz etý úshin ortalyqqa kireberistegi kólik turaǵy túgeldeı alynatyn boldy. Jáne «Atakent» aýmaǵyna qaqpadan kólikterdiń kirýine tyıym salynady.