Búgin QR Din isteri jáne azamattyq qoǵam mınıstri Darhan Káletaev Amerıka Qurama Shtattarynyń Qazaqstan Respýblıkasyndaǵy Tótenshe jáne Ókiletti Elshisi Djordj Krolmen kezdesti, dep habarlaıdy Qamshy.kz aqparat agenttigi.

Kezdesý barysynda mınıstr Qazaqstan AQSH-pen jan-jaqty seriktestik deńgeıinde qarym-qatynastardy damytýǵa aıryqsha mán beretinin aıta kele, qazirgi ýaqyttaǵy din salasynda júrgizilip otyrǵan memlekettik saıasat týraly áńgimeledi. 

Darhan Káletaev Qazaqstanda memleket pen din arasynda ózara is-qımyldyń ózindik úlgisi qalyptasyp kele jatqanyna toqtalyp, osy baǵytta «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý týraly» Zań jobasy ázirlengenin atap ótti.  

Mınıstrdiń aıtýynsha, qazirgi ýaqytta elimizde ártúrli dinder men konfesıalar ókilderi arasynda ózara is-qımyl jáne yntymaqtastyq úshin qolaıly jáne konstrýktıvti jaǵdaı qalyptasqan.

Taraptar tájirıbe almasý jáne dinı qyzmetti retteý salasyndaǵy ózara is-qımyl jónindegi yntymaqtastyq máselelerin talqylady.

Kezdesý sońynda taraptar birlesken tıimdi qarym-qatynastardy ornatýdaǵy ortaq bastamalar Amerıka Qurama Shtattary men Qazaqstan arasyndaǵy tabysty yntymaqtastyqtyń kepili bolatynyn jetkizdi.