Aǵymdaǵy oqý jylynda jańartylǵan bilim berý mazmuny boıynsha 1, 2, 5 jáne 7 synyp oqýshylary bilim alýda.
Búgin Almaty qalasynyń Óńirlik komýnıkasıalar qyzmeti alańynda Qazaqstan Respýblıkasynyń Bilim jáne ǵylym mınıstrligi «Oqýlyq» respýblıkalyq ǵylymı-praktıkalyq ortalyǵynyń dırektory Beıbitkúl Sársemhanqyzynyń qatysýymen brıfıń ótti.
Beıbitkúl Kárimovanyń aıtýynsha, ózderińizge belgili, aǵymdaǵy oqý jylynda jańartylǵan bilim berý mazmuny boıynsha 1, 2, 5 jáne 7 synyp oqýshylary bilim alýda.
Búgin sizdermen kezdesýimizdiń basty taqyryby jańartylǵan bilim berý mazmunyna kóshýdiń kelesi kezeńi – jańa oqý jylynda endiriletin 3, 6 jáne 8 synyp oqýlyqtaryn daıyndaý barysy.
Aldymen osy oqýlyqtardyń sapasyn baǵalaý júıesindegi jańalyqtarǵa qysqasha toqtalatyn bolsaq 2017 jyldyń jeltoqsan aıynda «Oqýlyqtardy, oqý-ádistemelik keshender men oqý-ádistemelik quraldardy ázirleý, saraptama júrgizý, olardy basyp shyǵarý jónindegi jumysty uıymdastyrý qaǵıdasyna» ózgerister engizildi,-deıdi ol.
Osy qujattaǵy basty ózgerister:
- orta mektepke arnalǵan oqý ádebıetteriniń avtorlyq ujymyna talap kúsheıtildi. Qazirgi kezde avtorlyq ujym quramynda ǵalym, ádisker jáne muǵalim bolýy kerek;
- árbir tórt jylda oqý basylymdaryn qaıta óńdeý týraly qaǵıda alynyp tastaldy. Avtorlyq ujym oqý ádebıetterin bilim berý standarttaryna, úlgilik oqý baǵdarlamalaryna eleýli ózgerister engizgen jaǵdaıdy, onyń sapasynyń monıtorıńi nátıjelerin eskere otyryp qana óńdeıdi;
- negizgi orta jáne jalpy orta bilim deńgeılerine arnalǵan oqýlyqtardy synaqtan ótkizý normasy bekitildi;
- pándik komısıalar oqýlyqtardyń jáne oqý-ádistemelik keshenderdiń saraptama, synaq, oqýlyqtar sapasyn qoǵamdyq baǵalaýdyń aralyq jáne sońǵy qorytyndylaryn qarastyrady. 3, 6 jáne 8 synyptarǵa arnalǵan oqýlyqtar men oqý-ádistemelik keshender pándik komısıalardyń 2 otyrysynda qarastyryldy,-dep atap ótti ol.
Sonymen qatar bul oqýlyqtar respýblıkamyzdyń barlyq óńirlerinde oqýlyq avtorlarynyń qatysýymen arnaıy semınarlarda talqylandy. Bul semınarlarda avtorlar óz oqýlyqtarynyń tujyrymdamasymen, qurylymy jáne mazmunymen mektep muǵalimderin, ádistemelik ortalyqtardyń ádiskerlerin tanystyrdy. Talqylaýlar, pikir almasýlar uıymdastyryldy. Bul sharaǵa 160 oqýlyq avtorlary men 7000-nan asa muǵalimder qatysty.
Osy oqýlyqtar boıynsha «Oqýlyq sapasyn baǵalaý» portalyna da syn-pikirler tústi,-dep baıandady Beıbitkúl Sársemhanqyzy.
Beıbitkúl Sársemhanqyzynyń aqparatynsha, oqytý prosesine engiziletin oqýlyqtardy irikteýdegi sheshýshi is-shara - pándik jáne Respýblıkalyq komısıalardyń otyrystary boldy. Bul komısıalar qazaq jáne orys tilinde oqytatyn mektepterge arnalǵan 186 oqýlyqtardy qarastyryp, 138-in mektepterde qoldanýǵa usyndy.
Bilim jáne ǵylym mınıstiriniń buıryǵymen Mektepke deıingi jáne orta bilim oqýlyqtary men oqý-ádistemelik keshenderin basyp shyǵarýǵa daıyndaýdy úılestirý jónindegi jumys toby qurylǵan bolatyn. Jumys toby quramynda 15 jýrnalıs pen baspasóz ókilderi, 17 lıngvıs-ǵalymdar (Ahmet Baıtursynuly atyndaǵy Til bilimi ınstıtýty mamandary), pánder boıynsha 75 maman (23 ǵalym, 44 mektep muǵalimderi, 8 ádisker) boldy,-dep atap ótti ol.
Jumys toby 2018 jyldyń 9-26 sáýir aralyǵynda 3, 6 jáne 8 synyptarǵa arnalǵan oqýlyqtar men oqý-ádistemelik keshenderge, mektepke deıingi tárbıe men oqytýǵa arnalǵan oqý ádebıetterine baspa aldy pysyqtaý jumystaryn júrgizdi.
Ár pán mamandary pándik jáne Respýblıkalyq komısıalar bergen eskertýler men usynystar boıynsha jumystar júrgizdi. Jumys barysynda oqýlyqtardaǵy málimetter naqtylanyp, tapsyrmalarǵa, ıllústasıalarǵa, anyqtamalarǵa jáne kórkem shyǵarmalardyń úzindilerine qatysty usynystar jasaldy. Usynystar men eskertýler birden avtorlarmen kelise otyryp óńdeldi. Baspasóz ókilderi oqýlyqtardaǵy barlyq mátinderdiń áleýmettik qabyldaýyna qatysty muqıat qarap shyqty. Til bilimine qatysty mamandar oqýlyqtardaǵy termınderdiń aýdarmasyn jáne sózderdiń jazylýyn bir izge túsirdi. Osy atqarylǵan jumystar oqýlyqtardyń sapasyn jaqsartýǵa eleýli úlesin tıgizdi dep senemiz.
Ár pán boıynsha atqarylǵan naqty jumystar týraly Jumys tobynyń músheleri tolyǵyraq aıtyp beredi,-dep sózin qorytyndylady Beıbitkúl Sársemhanqyzy.
