Ál-Farabı atyndaǵy QazUÝ-da 4-15 sáýir aralyǵynda ótken dástúrli V halyqaralyq Farabı oqýlarynyń qorytyndy jınalysy ótti.
QazUÝ rektory Ǵalym Mutanovtyń bastamasymen qatarynan besinshi jyl ótkizilip otyrǵan Farabı oqýlary Elbasy Nursultan Nazarbaevtyń «Bolashaqqa baǵdar:rýhanı jańǵyrý» baǵdarlamalyq maqalasy aıasynda ótti. Konferensıa ataqty oıshyl, Álemniń ekinshi ustazy atanǵan ál-Farabıdiń fılosofıalyq oı-pikirlerin, jazǵan kitaptaryn, baı murasyn jan-jaqty zerdeleýge baǵyttalǵan. Erekshe aıta keterligi, Farabı oqýlarynyń aýqymdylyǵy jyl ótken saıyn keńeıip, sharaǵa sheteldikterdiń qyzyǵýshylyǵy artyp keledi. Bıyl forýmnyń ashylý saltanatyna álemniń 30-dan astam elinen sheteldik ǵalymdar keldi, sonymen qatar elimizdiń JOO-lary men ǵylymı mekemeleriniń ókilderi qatysty.
QazUÝ rektory Ǵalym Mutanov: «Búgingi tehnıka men tehnologıa qaryshtap damyǵan zamanda ál-Farabı murasy erekshe qundylyǵymen adamzatqa áser etýde. Óıtkeni tehnıka adamdarǵa keremet múmkindikterdi ashqanmen, zıanyn da ákelýi múmkin. Sondyqtan sana men rýhanıaty tepe-teńdikte ustaı bilý óte mańyzdy. Osy turǵydan kelgende ál-Farabı barsha adamzatqa sananyń eń bıik qozǵaýshy kúshi rýhanıat pen adamgershilik bolýy kerektigin, olaı bolmaǵan kúnde álem jahandyq apatqa ushyrap, bar qundylyǵymyzdan aıyrylyp qalýymyz múmkin ekendigin aıtqan eken. Demek, ál-Farabı murasy jas urpaqty bilim men adamgershilik uǵymyn qatar alyp júrýge shaqyrady», – dep atap ótti.
Halyqaralyq forým aıasynda 17 iri halyqaralyq sharalar, ǵylymı konferensıalar men dóńgelek ústelder, semınarlar men ınovasıalyq jobalardyń baıqaýy ótti. Qorytyndy jınalysta stýdentter men jas ǵalymdarǵa arnalǵan «Farabı álemi» atty halyqaralyq ǵylymı konferensıa týraly Ǵylym jáne ınovasıalyq qyzmet jónindegi departament dırektory Serik Muhambetjanov baıandama jasady. Dástúrli túrde jyl saıyn ótip kele jatqan stýdentter men jas ǵalymdardyń «Farabı álemi» atty halyqaralyq konferensıasyna 6325-ge jýyq stýdentter men jas ǵalymdar qatysqan. Olardyń ishinde 583 qatysýshy elimizdiń JOO-larynan bolsa, 301 qatysýshy alys-jaqyn shetelderden kelgen, atap aıtar bolsaq, Nıderlandy, AQSH, Koreıa, Qytaı, Reseı, t.b.
«Farabı álemi» aıasynda fakúltetterde 117 seksıa jumys jasap, 191-ge jýyq dóńgelek ústelder men ǵylymı semınarlar ótti. Al jas ǵalymdar baıqaýyna 72 ınovasıalyq joba usynylyp, júzden júırik myńnan tulpar shyqqan jeńimpazdar dıplom jáne aqshalaı syılyqtarmen marapattaldy. Solardyń ishinde erekshe atap ótetin ınovasıalyq joba – mehanıka-matematıka fakúlteti stýdentteri qurastyrǵan «Gýmanoıd-robot», ıaǵnı ámbebap robot kópshiliktiń qyzyǵýshylyǵyn týǵyzdy. Adamǵa tán is-qımyldardyń barlyǵyn jasaı alatyn «Gýmonoıd-robot» bolashaqta QazUÝ-dyń «Keremet» stýdentterge qyzmet kórsetý ortalyǵynda qyzmetkerlermen birge stýdentterdiń suraqtaryna jaýap beretin bolady.
Sondaı-aq jıynda V halyqaralyq Farabı oqýlary boıynsha esep bergen fakúltet dekandary men jaýapty tulǵalardyń baıandamalary tyńdaldy.
Farabı oqýlary aıasynda ótken iri sharalardyń biri – Ońtústikte turaqty damý úshin ǵylym men tehnologıa boıynsha komısıasynyń («COMSATS») XXI-shi otyrysy. Atalmysh halyqaralyq úkimetaralyq uıym keńesiniń otyrysy Qazaqstanda jáne postkeńestik keńistikte alǵash ret ótkizildi. QazUÝ 2015 jyldan beri atalmysh halyqaralyq uıymnyń TMD-daǵy jalǵyz múshesi bolyp tabylady.
Uly oıshyldyń 1150 jyldyq mereıtoıyn 2020 jyly IýNESKO deńgeıinde atap ótýdi maqsat etip otyrǵan QazUÝ ál-Farabı murasyn zertteý boıynsha Farabı oqýlary atty asa aýqymdy sharany atqaryp otyr. Odan bólek ǵalymnyń kitaptary jaryq kórip, murajaı ashyldy, sondaı-aq «Al-Farabi university smart sity» jobasy júzege asyrylýda. Álemniń ekinshi ustazy atanǵan dara da dana tulǵa ál-Farabı murasy jyldar jyljyp, zaman qansha ózgeriske ushyrasa da óziniń ózektiligin eshqashan joǵalpaq emes.
