Senator Birǵanym Áıtimova Qazkom bankiniń Astana qalasyndaǵy fılıalynyń qyzmetkerleri Oǵyz Doǵanǵa qazaq tilinde qyzmet kórsetýden bas tartýyna qatysty pikir bildirdi.  

Sputniknews.kz portalynyń málimetine súıensek, senator barlyq salada memlekettik tilde qyzmet kórsete alatyn qyzmetkerler bolýy tıis ekenin aıtqan. 

«Men bankke barǵanda qaı tilde sóılesem, sol tilde jaýap alamyn. Munda esh qıyndyq joq. Degenmen, zańǵa sáıkes, barlyq salada klıentterge memlekettik tilde aqparat berýge mindetti. Zań bárine ortaq. Adamnyń ishki mádenıeti qalypty, emosıaǵa salynbaı suraq qoıyp, sol keıipte jaýabyn talap ete alatyndaı bolýy tıis. Al bank basshylyǵy memlekettik tilde qyzmet kórsete alatyn qyzmetkerlerdiń mindetti túrde bolýyn qadaǵalaýy kerek», — dedi Birǵanym Áıtimova.

Aıta keteıik, Oǵyz Doǵan qazaq tilinde qyzmet kórsetýden bas tartqan Qazkom bankiniń qyzmetkerlerin vıdeoǵa túsirip, jelige júktegen bolatyn. Ol bank keshirim surmasa,  «Eır Astana» sıaqty olardy da sotqa beretinin málimdedi.