Búgin «Alataý» dástúrli óner teatrynda Vİİ respýblıkalyq Quran jarysynyń jeńimpazdaryn saltanatty túrde marapattaý rásimi ótti, dep jazady Qamshy.kz aqparat agenttigi. Oǵan QMDB tóraǵasy Serikbaı qajy Oraz, qala ákiminiń orynbasary Arman Qyryqbaev jáne zıaly qaýym ókilderi qatysty.

Túrli nomınasıa boıynsha jeńiske jetken qarılardy marapattaý rásiminde quran oqyldy, din týrasynda án aıtyldy, óleń oqyldy.

Aıta keteıik, keshe qarılar Qurandy mánerlep oqýdan jarysty. Doda tańǵy 9-da bastalyp, túngi birge deıin jalǵasqan. Atalmysh dodaǵa el boıynsha 500 qarı qatysýǵa nıet bildirgen. Onyń 70-i irikteldi.

Jarysty uıymdastyrýshylardyń aıtýynsha, buǵan deıin ótkizilgen respýblıkalyq jarysta Qurandy jańylmaı oqıtyndarǵa oryn beriletin, bıyl ótken báıgede qatysýshylardyń tájýıd qaǵıdalaryn meńgerýi, Qurandy oqý máneri esepke alynǵan.

VII respýblıkalyq Quran baıqaýyna qatysqan qarılar «Mánerlep oqý», «Qurannyń 10 parasyn jatqa oqý boıynsha», «Qurannyń 20 parasyn jatqa oqý boıynsha» jáne «Qurannyń 30 parasyn jatqa oqý boıynsha» oqyǵandar bólek irikteldi. Jeńiske jetkender qarjylaı marapattaldy.

Ár jeńimpazǵa sertıfıkatty din ókilderi, qoǵam qaıratkerleri men respýblıkalyq baıqaýǵa demeýshi bolǵan Jamal apaı tabystady. Jamal apaı jınalǵan qaýymǵa aq batasyn berdi.

Qurandy 30 para boıynsha jatqa oqyǵandar

Qurandy tolyqtaı 30 para boıynsha oqý boıynsha 70 qarıdy basyp ozǵan 2-shi, 3-shi oryn ıeleri 1 mıllıon 500 myń teńgeden bastalatyn qarjylaı syılyqpen  marapattalsa, bas júlde ıegerine kóliktiń kilti tabystaldy.

Qurannyń 30 parasyn jatqa oqyǵandardyń arasynda 3-shi oryndy Jambyl oblysynan kelgen Jahsylykov Erkebulan Serjanuly ıelendi. Júlde qory -  1 mıllıon 500 myń teńge.

Ekinshi oryndy Astana qalasynan kelgen Hakımov Fazlıdın Abdıhýjauly ıelendi. Júlde qory - 2 mıllıon teńge.

Birinshi oryndy jáne bas júldeni jeńip alǵan qarı Mańǵystaý oblysynan keldi. Naǵmanov Naǵım Serikulyna avtokólik kiltin Bas mýftı  Serikbaı qajy Orazdyń ózi tabys etti.

Qurannyń 20 parasyn jatqa oqyǵandardyń arasynda oza shapqandar

3-shi oryndy Aqtóbe qalasynan kelgen qarı Qartbaev Salamat Alashuly ıelendi. Júlde qory -1 mıllıon teńge.  

Qarılar arasynda ótken jarysqa arnaıy Mańǵystaý oblysynan kelgen Sateshov Saqı Muhtaruly ekinshi oryndy ıelenip,  1 mıllıon 250 myń teńgeni qanjyǵasyna baılady.

SQO-dan kelgen Hokımov Mahmadrahım 1-shi oryndy ıelendi. Júlde qory - 1 mıllıon 500 myń teńge.

Qurannyń 10 parasyn jatqa oqyǵandar

3-shi oryn: Myńjasov Arystan Qojambetuly. Qarı 500 myń teńgeni qanjyǵasyna baılady.

2-shi oryn: Seıtqasym Erqanat Serikuly. Júlde qory - 750 myń teńge.

1-shi oryn: Keneshbaı Qýanysh Nurlanuly  - 750 myń teńgelik júldege ıe boldy.

«Qurandy mánerlep oqý» nomınasıasy boıynsha marapattalǵandar

Qazaqstan musylmandary dinı basqarmasynyń uıymdastyrýymen Qurandy jatqa jáne mánerlep oqý boıynsha VII respýblıkalyq baıqaýdyń úshinshi oryn ıegeri – Bekturǵanov Baýbek Berdiǵalıuly. Onyń júlde qory - 150 myń teńge.

Jarysqa arnaıy Astanadan kelgen Bıtenov Erlan Bazarbaıuly ekinshi oryndy qanjyǵasyna baılady. Júlde qory - 300 myń teńge.

Aqmola oblysynan kelgen Týrdaqynuly Taken birinshi oryndy ıelendi. Júlde qory - 500 myń teńge.

Respýblıkalyq jarysqa qatysqandarǵa alǵys hat pen 50 myń teńge kóleminde qarjylaı syılyqtar tabystaldy.