QR Eńbek jáne halyqty áleýmettik qorǵaý mınıstri Mádına Ábilqasymova bir jasqa deıingi balalarǵa tólenetin qarjynyń búdjette nelikten qysqarǵanyn túsindirdi, dep habarlaıdy QazAqparat.
Parlament Senatynyń búgingi otyrysynda «2018-2020 jyldarǵa arnalǵan respýblıkalyq búdjet týraly» QR Zańyna ózgerister men tolyqtyrýlar engizý týraly» zań jobasy talqylanǵan bolatyn. Talqylaý barysynda senator Dınar Nóketaeva áleýmettik salaǵa bólinetin shyǵystar mazalap otyrǵanyn jetkizdi.
«10 mlrd 722 mln teńge - onyń ishinde 5 mlrd 720 mln teńge qysqartylǵan (...). Naqtyraq aıtqanda, ortasha tólemderge baılanysty birrettik tólemaqy - ol myna bir jasqa kelgenge deıingi balalarǵa tólenetin jáne bala kútimine aı saıyn tólenetin qarajat. Sol qysqartylyp otyr. Buny qalaı túsinýge bolady? Mysaly, kórshiles elderdi alatyn bolsaq, balanyń týýyna jyldan jylǵa qoldaý kórsetilip keledi. Balanyń týýyna, kútimine bólinetin qarajatty jyldan jylǵa kóbeıtý arqyly balaly bolýdy úlken mártebege aınaldyrýda. Onyń qarjysyn ulǵaıtýda. Biz nege ony qysqartyp jatyrmyz? Mysaly, Reseı Federasıasynda «Ana kapıtaly» degen bar. Bala men anaǵa beriletin qarajatty qysqartý arqyly bala sanyn qalaı kóbeıtemiz? Demografıany qalaı kóteremiz?», - dedi senator.
Atalǵan suraqqa QR Eńbek jáne halyqty áleýmettik qorǵaý mınıstri Mádına Ábilqasymova jaýap berdi.
«Osy búdjettiń shyǵystary 5 mlrd 700 mln teńgege azaıýynyń birneshe sebebi bar. Birinshiden, 2,7 mlrd teńge - bul bala týýyna arnalǵan birjyldyq járdemaqy jáne bala bir jasqa tolǵanǵa deıin kútimine aı saıynǵy járdemaqy alýshylardyń boljamdy sanynyń azaıýyna baılanysty (...) Bul eń birinshi sebep. Biz josparlaǵanda - 5 jyl boıy bala týý dınamıkasy ósip jatqan. Biraq 2017 jylǵa qarasaq, týý 19 myń balaǵa azaıdy. Osy jyly járdemaqy alatyn adamdardyń sany qaıtadan azaıatynyn kútip otyrmyz. Osy jyldyń shyǵystaryn qarastyrǵanda, biz sol bes jyldyń dınamıkasyn alǵan edik. Biraq, 2017 jyldyń qorytyndysy boıynsha bizdiń boljamymyz ózgerdi. Bul negizgi sebep. Biraq, aıta keteıin, osy járdemaqynyń sany da mólsheri birqalypta qaldy. Tipti ósip keledi», - dedi mınıstr.
Onyń aıtýynsha, bala kútimine baılanysty tólemderdi qazir kóp áıelder jumysqa ornalasyp, ony áleýmettik saqtandyrý qorynan alyp jatyr.
«Taǵy bir sebep - ózderińiz biletindeı, birinshi jáne ekinshi balaǵa arnalǵan tólemderdiń mólsheri azdaý bolady da, úshinshi jáne tórtinshi balaǵa kóbirek tólenedi. Qazirgi bizdiń boljam boıynsha úshinshi jáne tórtinshi bala týýǵa baılanysty tólemderdiń sany azaıdy. Bir jáne eki balaly januıalardyń sany kóbeıdi. Sol sebepten biz shyǵystardy qaıta qysqarttyq. Biraq, barlyq tólemderdiń mólsheri aıtqanymdaı bir qalypta qalyp jatyr. Tipti mólsheri ósip keledi», - dep túıdi Mádına Ábilqasymova.
