Elimizdegi aq maqtany ósiretin jalǵyz óńir bolyp tabylatyn Ońtústik Qazaqstan oblysynda maqta dánin sebý jumystary bastaldy.  Otandyq toqyma ónerkásibiniń damýynyń negizin quraıtyn oblysta bıylǵy jyly meje boıynsha shıtti maqta 100 myń gektardan astam jerge sebiledi dep kútilýde. Qazirgi tańda ońtústikqazaqstandyq sharýalar 24 myń gektarǵa maqta dánin seýip úlgergen. Búginde maqta ósirýmen óńirdegi Arys pen Túrkistan qalalary men Maqtaaral, Shardara, Ordabasy aýdandary aınalysady.

Al elimizdegi aq altynnyń otany sanalatyn Maqtaaral aýdanynda meje boıynsha maqta shıti 75 myń gektarǵa egilý kerek bolsa, sharýalar bıyl maqta alqabyn 95 myń gektarǵa jetkizýdi josparlap otyr. Sońǵy kúnderi aýa-raıynyń qubylyp, jaýyn-shashynnyń jıilep ketýiniń saldarynan myrzashóldik dıqandar  maqta dánin sebý jumystaryn  byltyrǵydan 10-15 kúnge kesh bastady. Soǵan qaramastan búgingi tańda maqtaraldyq sharýalar 22 myń 844 gektarǵa maqta dánin ekken. Sondaı-aq, aýdanda 56 myń gektar jer chızldense, 93 myń gektardan astam alqap  tyrmalanyp, tuqymdyq shıttiń sebilýine daıyndalýda.

Bıyl óńirde tuqymdyq shıt tapshylyǵy sezilgen joq. Aq altyn egýmen aınalysatyn Maqtaaral aýdanynda 3 myń tonna shıt daıyndalǵan bolatyn. Budan bólek, aýdanǵa Qytaı men Túrkıa elderinen de tuqymdyq shıt tasymaldanýda. Qazirgi tańda sharýalar tuqymdyq shıttiń kelisin sortyna qaraı 250-300 teńge aralyǵynda satyp alyp jatyr.  Al 1 gektar alqapqa 30 keli maqta dáni sebiledi.

Aıta keteıik, oblysta ótken jyly 134,6 myń gektar jerge egilgen maqta shıtinen  330 myń tonna ónim alynsa, Maqtaral aýdanynyń qyrmanyna 219 myń tonnadan astam «aq altyn» jınalǵan bolatyn. Maqta daqylynyń ortasha ónimdiligi ár gektardan 23,1 sentnerdi quraǵan.