Elbasy Joldaýda sıfrlyq bilim berý resýrstaryn damytý, keń jolaqty Internetke qosý jáne mektepterdi vıdeoqurylǵylarmen jabdyqtaý jumystaryn jalǵastyrýdyń mańyzdylyǵyn nyqtap aıtqan edi. Sıfrlyq bilim berý júıesin damytý maqsatynda BQO-da birqatar sharalar qolǵa alynýda. Aıta ketsek, Batys Qazaqstan oblysynda bıyl 220 shaǵyn jınaqty mektepke «Bilim book» elektrondy júıesi jetkizilmek. Bul týraly «Sıfrlandyrý: barshaǵa qoljetimdi sapaly bilim» taqyrybymen ótken «BatysBilimTalks» lektorıı jobasynyń İ sesıasynda Batys Qazaqstan oblysynyń ákimi Altaı Kólginov aıtty.
Óńir basshysynyń aıtýynsha, oblystaǵy 444 eldi mekenniń 152-si ınternetke qosylmaǵan. Oǵan qosa mektepter, medpýnktter men basqa áleýmettik nysandar bar. Sonyń bárin ınternetke qosý josparǵa engizilgen. Osy oraıda «Qazaqtelekom» AQ basqarma tóraǵasy Qýanyshbek Esekeevpen jol kartasyna qol qoıyldy. Bul rette densaýlyq saqtaý, bilim berý mekemelerin sıfrlandyrýǵa barynsha mán beriledi. Ásirese, shalǵaı aýyldardaǵy shaǵyn mektepter aıryqsha nazar aýdarýdy qajet etedi. Qazirgideı jappaı damý kezeńinde ol bilim oshaqtary qala mektepterinen kem bolmaýy kerek. Sondyqtan 220 shaǵyn mektepke «Bilim book» elektrondy júıesin engizýge qarjy bólinip, memlekettik satyp alý jumystary júrgizilýde. 1 qyrkúıekte ol mektepter jańa kompúterlermen, baǵdarlamasymen qamtylady.
-«Bilim book» jobasy shaǵyn mektepterge yńǵaıly. Onda kompúter jadyna qajetti bilim resýrsy salynǵan. Internettiń qajeti joq. Bir synypta 15 baladan bilim alatyn bolsa, muǵalim olardyń árqaısysyna ár túrli elektrondyq tapsyrma bere alady. Bala sabaqty ıgermeıinshe, baǵdarlamamen alǵa jyljı almaıdy. Muny biz elimizdiń úsh shaǵyn mektebinde tájirıbeden ótkizip kórdik. Nátıjesi oıdaǵydaı. Bıyl Batys Qazaqstandaǵy shaǵyn mektepterde osy jumys qolǵa alynady. Basty maqsat - alys aýyldardaǵy mektepterde bilim sapasyn kóterý, - dedi R.Kenjehanuly.
Aýdan ortalyqtaryndaǵy mektepterde shákirtter elektrondy baǵdarlamalardy, jańa tehnologıalardy tolyq qoldanatyn bolady. Altaı Kólginovtiń sózine qaraǵanda, QR Aqparat jáne komýnıkasıalar mınıstrligimen birigip jasalǵan josparǵa sáıkes taıaýdaǵy úsh jylda ınternet máselesin sheshý kózdelýde. Atap aıtqanda, 100 eldi meken keń jolaqty ınternetke qosylyp, sıfrlandyrý jumystaryna jol ashylady. Bul oqýshylar men muǵalimderdiń sıfrlyq júıede bilim alyp, jumys jasaýyna múmkindik beredi. Sondaı-aq, «Qaýipsiz aýla» jobasy aıasynda «Qazaqtelekom» AQ-men birge Oralda 2 myń beınekamera ornatylady. Bul 200 kóp qabatty úıdi nemese 1 myń kireberisti qamtıdy.
Jıynda «Qazaqtelekom» AQ basqarma tóraǵasy Qýanyshbek Esekeev aldaǵy eki jylda Batys Qazaqstan oblysynyń bes aýdan ortalyǵyn optıkalyq-talshyqty baılanys jelisine qosý josparlanyp otyrǵanyn jetkizdi. «BilimmediaGroup» JSHS-nyń dırektory Raýan Kenjehanuly, «Knowledge Egineering» JSHS-nyń dırektory Nartaı Áshim «Bilim berýdegi zamanaýı trendter» jáne «Muǵalimderdiń kásibı biliktiligin arttyrýǵa arnalǵan sandyq resýrstar» taqyryptarynda óz oı-tájirıbelerimen bólisti.
