Elbasy «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» atty Joldaýynda tıimdi memlekettik basqarý týraly biraz másele kóterilgen edi. Ásirese óńirlerdegi memlekettik qyzmettiń tıimdilik áleýetin olardyń ekonomıkalyq derbestigi men jaýapkershiligin arttyrý, artylǵan qarajatty memlekettik qyzmetshilerdiń faktorlyq-baldyq shkalaǵa negizdelgen jańa eńbekaqy júıesin engizýge baǵyttaý qajettigin aıtqan bolatyn.Osy oraıda Qazaqstan Respýblıkasy Memlekettik qyzmet isteri agenttiginiń Batys Qazaqstan oblysy boıynsha departamenti memlekettik qyzmet basqarmasynyń basshysy Venera Masımovamen tildesken edik.
Onyń aıtýynsha, Batys Qazaqstan oblysyndap 4160 astam memlekettik qyzmetshi bolsa, onyń 42,6%-y er, 57,4%-y áıel adamdar eken.
- Memqyzmetkerlerdiń eńbek aqysy endi faktorly-balldyq shkala (FBSH) boıynsha tólenetin bolady. Aǵymdaǵy jyly atalmysh júıe pılottyq rejımde Astana, Mańǵystaý oblysy ákimdikterinde jáne Ádilet mınıstrligi men Memlekettik qyzmet ister jáne sybaılas jemqorlyqqa qarsy is-qımyl Agenttigine engizilgen. Halyqaralyq tájirıbeni eskere otyryp engizilgen faktarly-balldyq júıeli eńbek aqy laýazym fýnksıonalynyń aýqymdylyǵy men erekshiligine negizdelgen. Memlekettik qyzmetshiniń laýazymdyq mártebesine ǵana emes, ár qyzmetkerdiń tapsyrmany oryndaýdaǵy naqty úlesi eskeriletin bolady. Jańa tólem júıesiniń basty ereksheligi, júktelgen mindetter men nátıjeler sheńberi eskerilgen eki bólimnen turady. Birinshi bólim – faktorly-balldyq shkala negizindegi qyzmetkerdiń kepildi laýazymdyq eńbekaqysyn alady, ekinshisi – qyzmetkerler jyl qorytyndysy boıynsha eńbekterine saı bonýstarǵa ıe bolady,- deıdi ol.
Sondaı-aq QR Úkimetiniń 2018 jylǵy 15 naýryzdaǵy №125 qaýlysymen ákimshilik memlekettik qyzmetshiler biliktiligin arttyrý jáne qaıta daıarlaý kýrstarynda oqytý qarastyrylǵan. Memlekettik qyzmetshiler laýazymǵa taǵaıyndalǵan kúnnen bastap alty aıdan keshiktirilmeı qaıta daıarlaýǵa jiberiledi jáne úsh jylda bir ret biliktilik arttyrý kýrsynan ótedi. Bıyl Batys Qazaqstan oblysynda 1200-ge jýyq memlekettik qyzmetshilerdiń biliktilin arttyrý josparlanǵan. 1 sáýirdegi málimetke súıensek, biliktilikti arttyrý boıynsha jyldyq jospardyń 26%-y oryndalǵan. Sonymen qosa kásibı jáne avtonomdy memlekettik apparatty qurý arqyly memlekettik kyzmettiń mansaptyq modeli engizilgen bolatyn. Bul memlekettik qyzmetshilerge mansaptyq ósýin josparlaýǵa, kásibı turǵydan damýyna múmkindik beredi. Atalǵan modeldiń júıesinde, memlekettik kyzmetke alǵash ornalasýshylar ózderiniń kásibı qyzmetterin tómengi laýazymnan bastaýda. Aıta ketsek, oblys boıynsha jyl basynan beri 90-nan astam adam memlekettik qyzmetke tómengi laýazymnan óz qyzmetterin bastaǵan.
Gúlim AQAP,
Batys Qazaqstan oblysy
