Olımpıada chempıony Danıar Eleýsinov Nú-Iorkte ótken baspasóz máslıhatyna qatysty. 28 sáýir kúni ol kásibı bokstaǵy alǵashqy jekpe-jegin ótkizedi.

Baspasóz máslıhatyn Danıar Eleýsinovtiń promoýteri Eddı Hırn júrgizdi. Ol aldymen qazaqstandyq boksshyny tanystyrdy. Odan keıin qazaqstandyq boksshyǵa sóz berdi. Eleýsinov óz rızashylyǵyn aǵylshyn tilinde jetkizdi. Eddı Hırn bolsa, taǵy qazaqsha tilek bildirýdi ótindi. Osy kezde Danıar sál sasyp qalyp, oryssha sóıleı bastady. Biraq janynda turǵan aýdarmashy oǵan qazaq tilinde sóıleý kerektigin túsindirdi.

Bul týraly stan.kz habarlady.

«Men óte qýanyshtymyn. Búgin baspasóz máslıhaty ótip jatyr. Erteń, senbi kúni birinshi jekpe-jegime shyǵamyn. Búkil qazaq halqyn qýantyp, jeńiske jetemin dep úmittenemin. Álem chempıony bolsam deımin. Barlyqtaryńyzǵa raqmet! Jankúıer bolyńyzdar!», – dedi D.Eleýsinov.

Aıta keteıik, Danıar Eleýsinovtiń qarsylasy – amerıkalyq Noa Kıdd. Olardyń jekpe-jegi Denıela Djeıkobs men Maseı Sýleskı arasyndaǵy aıqastyń anderkartynda ótedi. Boks keshi Barclays arenada bolady.