Qazaqstan Syrtqy ister mınıstri Qaırat Ábdirahmanov Qytaı Halyq Respýblıkasyna resmı saparmen baryp, Qytaı Memlekettik keńesiniń múshesi, Syrtqy ister mınıstri Van Imen eki jaqty kelissózder ótkizdi. Bul jaıynda Qamshy.kz aqparat agenttigi habarlaıdy.

Baıypty kezdesýdiń barysynda syrtqy saıasat vedomstvolarynyń basshylary Qazaqstan-Qytaı qarym-qatynastarynyń keń aýqymdy máselelerin talqylady. Qazaqstan Prezıdenti Nursultan Nazarbaevtyń Qytaıǵa jasaıtyn aldaǵy sapardyń daıyndyǵyna jáne onyń Shanhaı yntymaqtastyq uıymynyń samıtine qatysýyna, sondaı-aq ártúrli deńgeılerdegi eki jaqty baılanystarǵa, sonyń ishinde saýda-ekonomıkalyq, ınvestısıalyq, ǵylymı-tehnıkalyq, mádenı-gýmanıtarlyq jáne basqa da baǵyttardy qamtıtyn Yntymaqtastyq jónindegi birlesken komıteti boıynsha baılanystarǵa erekshe kóńil bólindi.

Taraptar eki el azamattarynyń ózara saparlarymen jáne olardyń quqyqtaryn qorǵaýmen, transshekaralyq sý kózderin utymdy paıdalanýmen baılanysty máselelerdi qarastyrdy. Taıaý ýaqytta konsýldyq qyzmetter arqyly simaralyq konsýltasıalardy ótkizýge ýaǵdalasty.

Q.Ábdirahmanov Qazaqstan tranzıttik-kóliktik áleýetti iske asyrý, Qytaıdan Qazaqstan arqyly Eýropaǵa jáne Taıaý Shyǵysqa konteınerlik tasymaldardyń kólemin arttyrý aıasynda «Nurly jol» baǵdarlamasy men «Bir beldeý – bir jol» qytaılyq bastamasyn bir-birimen túıindestirýdi odan ári belsendi jalǵastyratyny týraly aıtty.

Taraptar Óndiristik qýatty damytý baǵdarlamasyn odan ári qarqyndy iske asyrýǵa múddelerin bildirdi. Búgingi kúni jalpy somasy 27 mıllıard dollardy quraıtyn 51 joba boıynsha jumys atqarylýda, sonyń ishinde 158 mıllıon dollarǵa 5 joba iske qosyldy. Qazaqstan aýyl sharýashylyǵy ónimderin Qytaı naryǵyna jetkiziliminiń nomenklatýrasyn keńeıtý óte mańyzdy bolyp tabylady.

Sonymen qatar, Mınıstrler ınvestısıalar, energetıka, qarjy, shekara mańyndaǵy saýda salalaryndaǵy yntymaqtastyqty nyǵaıtý, «Qorǵas» shekara mańy yntymaqtastyq halyqaralyq ortalyǵy qyzmetiniń tıimdiligin arttyrý boıynsha kelesi qadamdardy talqylady. 2017 jyly Qytaı Qazaqstannyń eń iri syrtqy saýda áriptesi boldy. Elimizdiń basqa memlekettermen saýda aınalymynyń jalpy kólemindegi QHR-nyń úlesi
17,4% quraıdy. Eki jaqty saýda kólemi 32,6% - ǵa artyp, 10,5 mıllıard dollarǵa jetti.

«Astana» halyqaralyq qarjy ortalyǵy, «Jasyl tehnologıalary» men ınvestısıalyq jobalarynyń halyqaralyq ortalyǵy jáne IT-startaptar tehnoparki qyzmetiniń iske qosylý aıasynda Qazaqstan-Qytaı yntymaqtastyǵynyń keleshigine erekshe nazar aýdaryldy.

Mádenı-gýmanıtarlyq baılanystardy keńeıtýdiń, týrızm, densaýlyq saqtaý, buqaralyq aqparat quraldary jáne basqa da salalardaǵy ózara is-qımyldyń mańyzdylyǵy atap ótildi.

Mınıstrler ózekti halyqaralyq jáne óńirlik máseleler boıynsha, sonyń ishinde Sırıadaǵy, Aýǵanstandaǵy jaǵdaılar boıynsha jan-jaqty pikir almasty. Kópjaqty qurylymdarda, sonyń ishinde SHYU, AÓSSHK jáne BUU aıasynda úılestikti jalǵastyrý nıetterin rastady.

Sonymen qatar, sapar barysynda Q.Ábdirahmanov Beıjińniń «Chaoıan» ortalyq parkindegi Abaı Qunanbaevtyń eskertkishine gúl shoǵyn qoıyp, Qazaqstannyń Qytaıdaǵy Elshiliginiń qoldaýymen Qytaıda alǵash ret qurylǵan «Baldyrǵan» qazaq oqý ortalyǵynyń ashylýyna qatysty.

Kezdesýge Úndistan Respýblıkasynyń SİM S. Svaradj, Qazaqstan Respýblıkasynyń SİM Q.Q. Ábdirahmanov, Memlekettik keńes múshesi, QHR mınıstri Van, Qyrǵyzstan Respýblıkasynyń SİM  Abyldaev, Pákistan SİM H.M. Asıf, Reseı Federasıasynyń Syrtqy ister mınıstri Lavrov, Tájikstan Respýblıkasynyń mınıstri Aslov, Ózbekstan Respýblıkasynyń syrtqy ister mınıstri Kamılov, SHYU Bas hatqyshy Alımov pen Aımaqtyq lańkestikke qarsy qurylymnyń atqarýshy komıtet dırektory Sysoev qatysty.