Armenıada opozısıa lıderi Nıkol Pashınán Úkimet basshysy bolyp saılana almady. Premer-mınıstrlikke jalǵyz úmitker bolǵan opozısıa lıderiniń úmitkerligine Armenıa Respýblıkalyq partıasynyń depýtattary qarsy daýys bergendikten tıisti daýysty jınaı almady.

Jalpy 53 daýys jınaý kerek bolǵan Pashınánǵa 45 adam daýys berdi. Konstıtýsıaǵa sáıkes, jeti kúnnen soń premer-mınıstrdi jańadan saılaý sharasy ótedi. Ekinshi týrda úmitkerlerdi jeke fraksıa emes, depýtattardyń jalpy sanynyń úshten bir bóligi tańdaıdy. Úkimet basyn bul joly da saılamaıtyn bolsa, Ulttyq otyrys avtomatty túrde tarqaıdy.

El parlamentiniń premer-mınıstrdi saılaı almaǵany týraly habardan soń Pashınánnyń jaqtaýshylary Erevanda sherýge shyǵatynyn málimdedi.

Aıta keteıik, 13 sáýirde Armenıadaǵy jappaı sherý aksıasyn basqarǵan Pashınán – premerlikke jalǵyz úmitker. Ony opozısıalyq «Elk» fraksıasy usyndy. Demonstranttar 23 sáýirde eldiń burynǵy premer-mınıstri Serj Sargsándy laýazymynan bosatyp, onyń ornyna Pashınándy úkimet basy etýdi talap etken.

«Elk»-tiń úmitkerin «Sarýkán» jáne «Dashnaksýtún» atty eki fraksıa da qoldady. Bul úsh fraksıanyń depýtattarymen qosa Armenıa Respýblıkalyq partıasynyń taǵy 6 depýtaty Pashınánǵa daýys berýi kerek edi. Partıa basshysy Vagram Bagdasarán buǵan deıin «úsh fraksıa Pashınándy qoldasa, Respýblıkalyq partıa bóget keltirmeıdi» dep málimdegen.