Búgin Ońtústik Qazaqstan oblysynyń ákimi J.Túımebaev Qazaqstandaǵy Qytaı Halyq Respýblıkasy Shensı provınsıasy Úkimeti ókildiginiń basshysy Chen He bastap kelgen ınvestorlarmen kezdesti. Bas qosýda taraptar eki el arasyndaǵy ekonomıkalyq baılanysty arttyrý, birlesken jobalar quryp, oblys aýmaǵynda kásiporyndar ashý jaıyn talqylady.

Kezdesýde oblys ákimi qonaqtardy óńirimizdiń ekonomıkalyq áleýetimen tanystyra kele, óndiris oryndaryn ashýǵa nıetti ınvestorlarǵa barynsha jaǵdaı jasalatynyn jetkizdi.

«Ózderińiz biletindeı, Qazaqstan men Qytaı arasynda strategıalyq baılanys ornaǵan. Nátıjesinde eki el arasyndaǵy taýar aınalym 10,4 mlrd. AQSH dollaryn qurady. Bir ǵana bizdiń oblystyń ózinde qytaılyq kompanıalardyń qatysýymen 5 birdeı joba júzege asyp otyr. Bolashaqta ózderińizben dıplomatıalyq qarym - qatynasty nyǵaıta otyryp, ınvestısıalyq jobalardy júzege asyramyz degen oıdamyz», – dedi Janseıit Qanseıituly.

Óz kezeginde qonaqtar oblysymyzda qorǵasyn jáne myrysh qaldyqtaryn qaıta óńdeıtin zaýyt salýǵa nıetti ekenin jetkizdi. Jalpy quny 4,8 mlrd. teńgeni quraıtyn joba jylyna 300 myń tonna qaldyqty óńdeýge qaýqarly. Zaýyt iske qosylsa, 100-den astam jańa jumys orny ashylatyn bolady.

Sondaı-aq, óńir basshysy qytaılyqtardy eki jaqty memorandým túzýge shaqyrdy. Osynyń negizinde oblysymyzda óndiriletin aýyl sharýashylyq ónimderin Qytaıǵa eksporttaý jaıyn aqyldasty. Odan bólek, elektr qýatymen júretin kólik shyǵaratyn zaýytty ońtústikten salýdy usyndy. Qonaqtar bul usynystarǵa qyzyǵýshylyq tanytyp, atalǵan jobalardy birge júzege asyrýǵa daıyn ekenin aıtty.

Jıyn sońynda qos tarap bir-birine syı-sıapat jasap, estelikke sýretke tústi.