Qazaqstan Ulttyq bankiniń tóraǵasy Danıar Aqyshev Astanada QR Parlamenti Senatynyń otyrysynda sóılegen sózinde "7-20-25" baǵdarlamasyna qatysqysy keletin azamattarǵa birqatar usynymdar berdi, - dep habarlaıdy Qamshy.kz aqparat agenttigi Tengrinews.kz saıtyna silteme jasap.

"Birinshi, Ulttyq Bank basshysynyń aıtýynsha Baǵdarlamaǵa qatysýshy satyp alǵysy keletin turǵyn úıdi tańdaýǵa tıis. Baǵdarlamada turǵyn úıdiń shekti quny belgilenetin bolady. Máselen, Astana, Almaty, Aqtaý jáne Atyraý sıaqty qalalarda turǵyn úıdiń eń joǵarǵy quny 25 mıllıon teńge, basqa óńirler úshin - 15 mıllıon teńge bolady. Bastapqy kezeńde tek bastapqy turǵyn úıdi satyp alýǵa ǵana ótinishter qaralatyn bolady dep boljanyp otyr", - deıdi Aqyshev.

Ekinshiden, onyń aıtýynsha, baǵdarlamaǵa qatysqysy keletin azamat ótinish pen qajetti qujattardy alyp bankke kelýi tıis. "Biz jaqynda qajetti qarjylyq kórsetkishteri bar, fılıaldyq jelisi damyǵan jáne azamattarǵa qyzmet kórsetýge jaǵdaıy bar bankterdi, sondaı-aq qajetti qujattardyń bazalyq tizbesin anyqtaımyz", - dep atap ótti Ulttyq bank basshysy.

Sonymen qatar ol qatysýshynyń kredıtke qyzmet kórsetý úshin qajetti kirisiniń bolýy, sondaı-aq menshik quqyǵynda turǵyn úıiniń bolmaýy qajet ekenin aıtty.

"Ulttyq bank atalǵan qaǵıdalardy túsindirý úshin barlyq kúsh-jigerin salady jáne halyqpen belsendi jumys jasaýǵa daıyn", - dep sózin qorytyndylady ol.