Jelide óziniń seks-quldyqtan qashyp shyqqanyn aıtyp, bazardaǵy halyqtan kómek suraǵan qyzdyń vıdeosy tarady, dep habarlaıdy Qamshy.kz aqparat agenttigi.

Oqıǵa 2018 jyly 5 mamyrda saǵat 17:00 shamasynda Almatydaǵy «Saıahat» avtobeketiniń mańynda bolǵan kórinedi.

Kadrda bir qyzdy birneshe adam alyp ketýge tyrysyp jatyr. Bazardaǵy satýshylar qyzǵa arasha túsip, ony «qýǵynshylarǵa» bermeı qoıady. Qyzdyń artynan qýyp kelgen Toyota Camry kóligi adamdardy basýǵa shaq qalyp, qashyp ketedi.

Al qyz «Jedel járdem» kóligine otyrýdan bas tartyp: «Anaý barady qazir. Olar meni bolnısadan alyp ketedi, jibermeńdershi», – dep elge jalynady.

Qyzdy qorǵaǵan áıelder: «Qazaqtyń qyzdaryn qyrǵyzdarǵa satyp qorlatyp, solardyń atynan aqsha jasamaqsyńdar», – dep áldekimderdi aıyptaıdy.

«Mynalar adam satyp júr», «bir qora adam bir qyzdy qýyp júr ǵoı, konechno satady», – degen daýystar anyq estiledi.

Ózin Erjan dep tanystyrǵan kýágerdiń aıtýynsha, bul qyz «Saıahat» avtobeketi mańynda júrip bara jatqan kólikten sekirip túsken. Ekinshi bir kólik ony baıqamaı qaǵyp ótken.

– Qyz janushyra tura salyp, bir aıaǵynda aıaq kıimi joq, bazarǵa qashyp kirdi. Bazar kúzetshilerine baryp kómek surady. Onyń artynan bireýler qýyp kelip, «ápkesimin», «aǵasymyn», «týysymyn» dep qyzdy alyp ketpekshi boldy. Biraq qyz: «Men bularmen barmaımyn, men 4 jyl quldyqta boldym. Bular meni buryn da osylaı qashqan kezde ustap alǵan. Ol jerde qyzdar kóp», – dep jylady. Sóıleı almaı dirildep, esi shyǵyp, qatty qorqyp qalǵan. Olardyń jeńgetaılary qyrǵyzdar eken. Joǵarǵy basshylarmen de baılanysy bar, bir sózben aıtqanda, tis batpaıtyn dókeıler. Jalǵan aqparat deseńizder, «Saıahat» qyzmetkerleri kýá, – deıdi Erjan.