Reseıdiń birneshe qalasynda oppozısıoner Alekseı Navalnyıdyń bastamasymen "Ol bizge patsha emes" ("On nam ne sar") qarsylyq sharalary ótip jatyr, dep habarlaıdy Qamshy.kz aqparat agenttigi. 

Máskeý ortalyǵyndaǵy sherýge barǵan Alekseı Navalnyıdy polısıa ustap áketti. "Navalnyı Pýshkın alańyna kelgen bette tutqyndaldy", — deıdi oppozısıoner Leonıd Volkov.

Máskeý bıligi narazylyq aksıasyn ótkizýge kelisim bermegen, prokýratýra oppozısıoner Alekseı Navalnyıǵa zańsyz sherý ótkizýdiń saldary qıyn bolýy múmkin ekenin eskertken.

Orys BAQ-tary taratqan aqparatqa súıensek, sherý Habarovsk, Vladıvostok, Iýjno-Sahalınsk, Irkýtsk jáne Komsomolsk-na-Amýre qalalarynda da bolǵan.

"Ol bizge patsha emes" aksıasy Vladımır Pýtınniń 7 mamyrǵa belgilengen ulyqtaý rásimine qarsy uıymdastyryldy. Buǵan deıin Reseıdiń Sankt-Peterbýrg, Tambov, Cheboksary jáne ózge qalalarynda Navalnyıdyń jaqtastaryn polısıa tutqyndaǵan.